Búgin Úkimettiń baspasóz ortalyǵynda ótken baspasóz konferentsiiasy barysynda QR Indýstriia jáne infraqurylymdyq damý ministrliginiń Indýstriialyq damý jáne ónerkásip qaýipsizdigi komitetiniń tóraǵasy Qanat Baiytov Qazaqstanda kómir baǵasynyń qalai túziletini týraly aityp berdi, dep habarlaidy "Ult aqparat".
Q. Baiytov túsindirgendei, búginde kommýnaldyq-turmystyq qajettilikter men turǵyndar úshin kómirdiń jalpy kólemi taýarlyq birja arqyly ótkiziledi (89%). Energetika jáne ónerkásip kásiporyndaryna kómir tikelei kelisimsharttar boiynsha razrezderdiń bosatylatyn baǵalary boiynsha tieledi.
«Kommýnaldyq-turmystyq qajettilikter men turǵyndar úshin kómir baǵasy razrezde tieý baǵasyna (óndirlýine bailanysty tonnasy úshin 3-7 myń teńge aralyǵynda), tasymaldaýǵa jumsalatyn temirjol tarifterine, jyljymaly quramǵa qyzmet kórsetýge, kómirdiń birjalyq baǵasyna, sondai-aq turǵyndarǵa kómir jetkizetin deldal uiymdar men jeke tulǵalardyń marjasyna bailanysty bolady», — dedi Komitet tóraǵasy.
Sonymen qosa, Ulttyq ekonomika ministrligi júrgizgen taldaýlar kóterme baǵamen jetkizýshilermen (deldaldarmen) taýarlyq birjadan soń 1 tonna kómirge ústeme baǵa 90% quraitynyn kórsetti.
«Árbir jait boiynsha biz tekserýler júrgizdik. Árbir júrgizýshimen sóilestik. Sońǵy ýaqytta jetkizýshilerge qatysty, olar baǵany aspandatyp jiberedi degen shaǵymdar kóp boldy. Biz mashinalar boiynsha saraladyq. Úsh tasymaldaý túri bar. Birinshisi - razrezge ózderi baryp, kómirdi tiep alyp, turǵyndarǵa jetkizetin ózin-ózi jumyspen qamtyǵan turǵyndar. Onda baǵany tym kóteredi degen nárse joq. Ekinshisi - temirjoldyń tuiyqtalǵan basynda turatyndar. Mundaida siz ózińiz kelip, kómirdi tańdap, baǵasy týraly kelisimge kelesiz. Mysaly, Nur-Sultan boiynsha kómir 100-120 km ara qashyqtyqqa jetkiziledi. Úshinshisi - kómirdi satyp alyp, tas joldardyń birine shyǵyp ony qymbatyraq satyp ala alatyn adamdardy kútip turatyndar. Ondailardyń sany óte az, sondyqtan olar kómir baǵasyna yqpal ete almaidy», — dedi Q. Baiytov.
Sonymen qatar ol búgingi tańda túrli markaly kómirdiń baǵasy túrli ken ornyna jáne óndirýdiń ózindik qunyna, satylatyn jerine jetkizý ara qashyqtyǵyna bailanysty orta eseppen túrli óńirlerde 1 tonnasy úshin 7 myń teńgeden 19 myń teńge aralyǵynda ekenin aitty.
«Mysaly, biz Nur-Sultan qalasy boiynsha monitoring júrgizdik. Kómirdi qalanyń túrli bólikterine ótkizetin 8 kompaniia anyqtaldy. Barlyq kómir túrleriniń baǵalary belgilengen. Jetkizý qunynsyz ortasha baǵasy bir tonnasy úshin 12 myń teńgeni quraidy. 24-30 qazan aralyǵynda elordaǵa 141 vagon nemese 9770 tonna kómir jetkizildi», — dedi Q. Baiytov.
Bul rette, 2019 jylǵy 31 jeltoqsanǵa deiin turǵyndardyń kómir qajettiligin 300 myń tonnany quraidy. 2019-2020 jyldardaǵy qysqy jylytý maýsymy kezeńinde kómirdi jalpy tutyný turǵyndar qajettilikteri úshin 500 myń tonnany quraidy.
«Turǵyndar men kommýnaldyq-turmystyq sektordy 2019-2020 jyldardaǵy jylytý maýsymynda qajetti ári sapaly kómir kólemimen qamtamasyz etý boiynsha jumystar Ministrlik pen jergilikti atqarýshy organdardyń turaqty baqylaýynda», — dedi Q. Baiytov.
