London Olimpiadasynyń qola júldegeri Aqjúrek Tańatarov Rioda óner kórsetken qazaqstandyq balýandarǵa qatysty óz pikirin bildirdi. Onyń aitýynsha, tórt jyldyq dodada beldesýge laiyqty shyn balýandardyń birazy Olimpiada kezinde taqymyn qysyp úiinde otyrǵan, dep habarlaidy Baq.kz tilshisi.
«Men Olimpiada jaily alǵashqy postty shyǵarǵannan túrli oi-pikirin bildirip, kommentter kelip jatyr. Ókinishtisi, sol pikirlerdiń rastyǵy. Máselen, 57 keli salmaq dárejesinde elimizde Rasýl Qalievqa shaq keletin palýan joq shyǵar. Onyń dáleli retinde myna jetistikterin tizbelep kóreiin. Rasýl 2012 jylǵy jastar arasyndaǵy álem chempionatynyń kúmis júldegeri (Baký), 2013 jylǵy Aziia chempionatynyń qola júldegeri (Niý-Deli), 2014 jylǵy Jazǵy Aziia oiyndarynyń kúmis júldegeri (Inchxon), 2014 jylǵy Aziia chempionatynyń jeńimpazy (Astana), 2015 jyly Qazaqstan chempiony atanǵan (Taldyqorǵan) balýan», – deidi Aqjúrek Tańatarov.
Bul salmaqta Rioda el namysyn Nurislam Sanaev qorǵaǵan. Alǵashqy kezdesýinde grýzin balýanynan jeńilip qalǵanymen, qarsylasy finalǵa shyqqandyqtan jubanysh beldesýine múmkindik alǵan edi. Alaida jubanysh beldesýinde ázirbaijandyq Gadji Alievten 8:10 esebimen utylyp qalǵan bolatyn. Osy kezdesýde jerlesimizdiń 4 upaiyn tóreshiler eseptemei qoidy.
London Olimpiadasynyń júldegeri 86 kelidegi Aslan Kahidzege de qatysty pikir bildirdi. Bul balýannyń Olimpiadaǵa barýy biraz daý týdyrǵan edi.
«74 keli salmaq dárejesinde el namysyn qorǵaǵan Ǵalymjan Óserbaev qolaǵa bir taban jaqyn boldy. Olimpiada oiyndaryna kommentatorlyq etken Islam Bairamýkov aǵamyz Ǵalymjannyń kezdesýin ózi sipattap bergen bolatyn. 86 keli salmaq dárejesinde sońǵy 4 jylda el chempionatyn bir ret utpaǵan Kaxidzeni talai jarysty utyp júrgen Azamat Dáýletbekov, Ádilet Daýlanbaev, Islam Azizov syndy talantty palýandarymyz jeterlik. Aslanmen Azamat 2 kezdesý, Ádilet 3 kezdesý, Islam 2 kezdesý ótkizip, úsh palýan da Aslannan aitarlyqtai basym bolǵan. Azamat Dáýletbekov – jastar arasynda Aziia chempiony, Álem birinshiliginiń kúmis júldegeri. Aslan Azizov – jastar arasynda Álem birinshiliginiń qola júldegeri, jastar arasynda Aziia chempiony», – deidi sportshy.
Olimpiadanyń sońǵy kúninde jarysqa shyqqan Mamed Ibragimov ekinshi beldesýinde grýziialyq Elizbar Odikadzege 1:6 esebimen utyldy. Aqjúrek Tańatarov bul salmaqta da elimizde myqty balýandardyń kóp ekenin aityp otyr.
«97 keli salmaq dárejesinde el birinshiliginde besinshi oryn alǵan Mamed Ibragimdi talai jeńgen Akbar Elýbai nemese Baqdáýlet Álmentailar el namysyn qoldan bermes edi. Bul eki palýan da jastar arasyndaǵy álem birinshiliginiń júldegerleri, Aziia chempionatynyń chempiondary, eresekter arasyndaǵy el birinshiliginiń chempiondary. Elimiz shet elde jaqsy kórsetkish kórsetip júrgen, «fýndamenti» nyq qalanǵan, bolashaǵynan zor úmit kúttiretin palýandardan kende emes. Tórt jylda bir ret bolatyn Olimpiadaǵa irikteý qalai ótkenin ózderińiz de túsingen shyǵarsyzdar? Baiaǵyda jastyqtan ba, álde jaýapkershilikti sezinbegendikten be asa qatty oilanbaýshy edim, al qazir syrttan baqylap, ózimizdiń erkin kúres úshin ishim ashyp otyr», – deidi tarazdyq balýan.
Aita keteiik, Qazaqstannyń erkin kúres quramasy alǵash ret Olimpiada oiyndarynda júldesiz qaldy. Buǵan deiin 4 jylda bir ret ótetin dodadan erkin kúres balýandary júldesiz oralyp kórmegen edi.
