- Qaraǵandyda Sport kúni Rio-de-Janeirodaǵy Olimpiadalyq oiyndardyń barlyq qatysýshylaryn quttyqtaidy. Elmira Syzdyqovaǵa erekshe qurmet kórsetiletin boldy. Bul týraly oblystyq dene shynyqtyrý jáne sport basqarmasynyń basshysy Natalia Sýhorýkova málimdedi.
«Olimpiada oiyndarynyń arenalarynda jaýapty jarys minberine kóterilip, kók týymyz jelbiregen sátte barsha Qazaqstannyń tóbesi kókke jetedi. Búgin Qazaqstan qorjynynda 15 medal tústi. Qaraǵandylyq jerlesimiz Elmira Syzdyqovany da qola medalimen quttyqtaimyz», - dedi Sport kúnine arnalǵan brifingte N. Sýhorýkova.
Onyń aitýynsha, 25 tamyzda Muz aidynynda úlken merekelik baǵdarlama ázirlenýde. «Bul shoý-kórsetilim, bul Olimpiada oiyndary qatysýshylaryn quttyqtaý. Eshkimdi eleýsiz qaldyrmaimyz. Elmiraǵa bir bólmeli páter tartý etemiz. Bul Qaraǵandy oblysy kúres federatsiiasynyń syilyǵy», - dep atap ótti sport basqarmasynyń basshysy.
Ol Riodaǵy Olimpiadaǵa 11 qaraǵandylyq qatysqanyn atap ótti. «Sporttyń aty - sport. Únemi jeńis tuǵyrynan kóriný bola bermeidi, jeńilis te, utys ta bolady», - dep qosty N. Sýhorýkova.
Elmira Syzdyqova - Á. Moldaǵulova atyndaǵy balalar sportynda daryndylarǵa arnalǵan internattyń tárbielenýshisi. QR áielder kúresi boiynsha halyqaralyq synyptaǵy sport sheberi. 2011 jylǵy jastar arasyndaǵy álem chempionatynyń qola júldegeri. 2012 jylǵy jastar arasyndaǵy Aziia chempiony, 2014 jylǵy Aziia chempionatynyń qola júldegeri, 2015 jáne 2016 jyldardaǵy Aziia chempionatynyń kúmis júldegeri.
Jeke bapker - Vladislav Sýtormin.
Qaraǵandyǵa Elmira 10 jyl buryn SQO-dan kelgen. Buǵan olimpiadalyq rezervtiń balalar-jasóspirimder mektebiniń basshysy onyń aǵasy Raiymbek Syzdyqov yqpal etti.
Eske salsaq, qazaqstandyq Elmira Syzdyqova jarysta mysyrlyq Enas Mustafany 7.4 esebimen utyp, Olimpiadanyń úshinshi ornyn ielendi. 62 kelige deiingi salmaq sanatynda birinshi oryndy japondyq Sara Doso, ekinshi oryndy - reseilik Natalia Vorobeva ielengen bolatyn.
