Olimpiada oiyndarynyń júldegeri Nurbaqyt Teńizbaev koronavirýs juqtyrdy. Qazir ol Taldyqorǵandaǵy oblystyq aýrýhanada em alyp jatyr, – dep habarlaidy "Ult aqparat".
«Iá, alynǵan synama oń nátije kórsetti. Pnevmoniia diagnozyn qoidy. Aýrýhanada emdelip jatqanyma bir apta boldy. Qazir ózimdi jaqsy sezinemin. Alǵashqy kúnderi qiyn boldy: dene qyzýym kóterilip, qatty jóteldim. Jedel járdem shaqyrdym. Dárigerler jaqsy kómektesýde. Qazir kóbi koronavirýspen aýyryp jatyr. Kóz jumǵandar da bar. Sondyqtan emdelip, densaýlyqty kútý kerek», - dedi Nurbaqyt Teńizbaev.
Nurbaqyt Moldahmetuly 1983 jyly 10 sáýirde Almaty oblysy, Panfilov aýdany, Úsharal aýylynda dúniege kelgen.
Grek-rim kúresinen Aziianyń birneshe dúrkin chempiony, 2008 jylǵy Beijiń Olimpiadasynyń kúmis júldegeri, 2009 jylǵy álem chempionatynyń qola júldegeri atanǵan kásibi sportshy. 2014 jyly Almaty oblystyq joǵarǵy sport sheberlik mektebiniń direktory qyzmetine taǵaiyndaldy.
2018 jyldyń qazan aiynan bastap Almaty oblystyq Dene shynyqtyrý jáne sport basqarmasynyń basshysy laýazymyn atqarady. Taldyqorǵan qalasynyń jáne Panfilov aýdanynyń qurmetti azamaty, «Qurmet» ordeniniń iegeri. Úilengen, eki balasy bar.
Esterińizge sala keteiik, buǵan deiin «Qaisar» fýtbol klýbynyń 25 oiynshysy koronavirýs juqtyrǵany habarlanǵan bolatyn.
