Olimpiada chempiony Daniiar Eleýsinov sal aýrýymen aýyratyn balalarǵa 10 million teńge aýdardy, - dep habarlaidy kaz.tengrinews.kz tilshisi.
Bul qarajatty sportshynyń jerlesteri men demeýshileri jinaǵan. Olar Eleýsinov pen onyń ákesine 10 million teńgelik sertifikatty tapsyrǵan bolatyn.
Búgin Daniiar Eleýsinovti týǵan jeriniń halqy kútip aldy. BQO ákimi Altai Kólginov chempionǵa alyp kelgen júldesi úshin alǵys aitty. "Biz senimen maqtanamyz, Daniiar! Qazaqstan jastaryna úlgi bol. Seniń jeńisiń - búkil eldiń, bapkerler quramynyń, ózińdi baptaǵan ákeńniń jeńisi. Sol ákeń saǵan dańǵyl jol ashyp berdi. Seniń chempion bola alatynyńdy bárine sendirdi, saǵan tek damýǵa múmkindik berý kerek. Sen barlyǵymyzdyń úmitimizdi aqtadyń!", - dedi ákim chempionǵa.
Altai Kólginov jerlesteriniń atynan Daniiar men onyń ákesi Maratqa 10 million teńgeden sertifikattar berdi. "Saǵan zamanaýi batyr retinde at berildi, páterdi biz de bere alar edik, biraq sen Astanada turasyń. Sondyqtan saǵan osyndai syi jasaiyq dep sheshtik", - dedi ákim. Olimpiada chempiony óz gonoraryn sal aýrýyna shaldyqqan balalarǵa aýdaratynyn málimdedi. Al ákimge sportshy óziniń boks qolǵabyn syilady.
Al taiaýda Oralda Daniiar Eleýsinov atyndaǵy boks ortalyǵy ashylady.
