Búgin Parlament palatalarynyń birlesken otyrysynda Májilis Tóraǵasy Nurlan Nyǵmatýlin aldaǵy sessiiada depýtattardyń aldynda turǵan mańyzdy mindetterin atady, dep habarlaidy QazAqparat.
«Aldaǵy sessiiada eki palata depýtattarynyń aldynda kóptegen mańyzdy mindetter tur. Ol - eń bastysy Tuńǵysh Prezidentimiz – Elbasy Nursultan Nazarbaevtyń strategiialyq baǵytyn jáne Memleket basshysy Qasym-Jomart Toqaevtyń Qazaqstan halqyna Joldaýyn tolyqtai sapaly zańdarmen qamtamasyz etý. Osyǵan bailanysty depýtattyq korpýs Úkimetpen birlesip, ulttyq ekonomikany jáne kásipkerlikti damytý, azamattardy áleýmettik qoldaý, sonymen birge Táýelsizdikti jáne demokratiiany odan ary nyǵaitý boiynsha belsendi jumys atqaratyn bolady. Osy jolda bolashaqta Parlament óziniń zań shyǵarý qyzmetin tiimdi jalǵastyrady», - dedi Májilis tóraǵasy.
Nurlan Nyǵmatýlinniń atap ótýinshe, qazirgi ýaqytta palata qaraýynda 35, onyń ishinde «Ónerkásiptik saiasat týraly», «Ósimdikter dúniesi týraly», «Semei iadrolyq qaýipsizdigi týraly», «Áskeri politsiia organdary týraly» zań jobalary bar.
«Al eń negizgi zańdardyń biri ol - árine elimizdiń bas qarjy qujaty. Osyǵan bailanysty biz ádettegidei 3 jyldyq «2022-2024 jyldarǵa arnalǵan respýblikalyq biýdjet týraly» zań jobasyn qabyldaityn bolamyz. Onda elimizdiń áleýmettik-ekonomikalyq jaǵdaiyn kúsheitýge, pandemiia saldaryn eńserýge, el damýyndaǵy mańyzdy bastamalardy júzege asyrýǵa qajetti memlekettik qarajattardy zańmen bekitemiz. Sonymen qatar kelesi sessiiada memlekettik jastar saiasaty, qoǵamdyq baqylaý, basqa da halyq problemasyn sheshýge arnalǵan zańdardy qabyldaý el damýyna, qoǵam damýyna jańa serpin bereri sózsiz. Osynyń barlyǵy bizdiń jumysymyzdyń bir ǵana bóligi dep aitýǵa bolady», - dedi palata spikeri.
