Búgin, 10 tamyz kúni Atyraý oblysynyń ákimi Nurlan Noǵaev aýdandarǵa jasaǵan saparynyń qorytyndy jinalysyn ótkizdi. Otyrysqa aýdan ákimderi, basqarma basshylary men BAQ ókilderi qatysty.
Sapar qorytyndysy boiynsha oblys ákimi aýdandardy damytý jumys josparyn jasaqtap, onyń aiasynda 223 is sharany bekitip berdi. Atalǵan sharalar josparyn oryndaý men olardyń oryndalysyn baqylaý aýdan ákimderi men oblys ákimniń orynbasarlaryna tapsyryldy.
Nurlan Noǵaevtyń aitýynsha, aýdandardaǵy infraqurylym, áleýmettik máselelerdi sheshý jumystary durys jolǵa qoiylǵan. Ásirese, aýylsharýashylyq salasynyń damýy qarqynmen júrip jatyr. Oblystyń burynǵy ákimi Baqtyqoja Izmuhambetovtyń arqasynda oblysta siyr sútin, eshki sútin óndirý zaýyttary, kóptegen egis alqaptary jumys istep tur. Aimaq basshysy osy jumystardy ári qarai ár aýdannyń ereksheligin eskere otyryp jalǵastyratynyn aitty.
Nurlan Noǵaev erekshe toqtalǵan jaǵdai aýyz sý máselesi boldy. Naqty aitqanda, Qurmanǵazy aýdanyndaǵy Azǵyr eldi mekeniniń jaǵdaiy sóz etildi. Onyń aitýynsha, aýyl halqy áli kúnge deiin sýdy kólikpen tasyp iship otyr. Ol azdai jańadan salynǵanyna qaramastan sý saqtaityn eki rezervýardyń bireýi tesilip tur. Aimaq basshysy buǵan jaýapty basshylardy jaýapqa tartty. “Eger salynǵan nysan durys jobalanbaǵan bolsa nemese qurylys jumystary durys júrgizilmese, ony qalai qabyldap aldyńyzdar? Endi oǵan qaitadan jóndeý jumystaryn júrgizeiin otyrsyzdar ma? Bul salǵyrttyqtyń belgisi. Máseleni tezdetip sheshińizder. Nátijesin maǵan jetkizińiz“, - dedi Nurlan Noǵaev.
Aimaq basshysy sonymen qatar aýdandardaǵy mektepterdiń jaǵdaiyn sóz etti. Ol keibir mektep basshylary óz jumystaryna jaýapkerlishikpen qaramaitynyna nazar aýdardy. ''Áleýmettik nysan basshylary óz obektilerine uqyptylyqpen qaramaidy. Máselen Mahambet aýylyndaǵy balabaqsha nemese Taisoiǵandaǵy mektep. Salynǵanyna 5-6 jyl ǵana bolsa da, azyp-tozyp ketken. Qai basshy bolsa da, jaýapkershilik alyp, jumysty bar kúshin salyp isteýi kerek'', - dedi ákim.
Oblys ákimi osylaisha basshylardy sheshim qabyldaýdan qashpaýǵa shaqyrdy. ''Sheshim qabyldamaityn bolsańyzdar ol jerde nege otyrsyzdar? Olai bolsa, jumys istemeitin basshylardyń ornyna sheshim qabyldaýdan qoryqpaityn adam qoiý kerek, - dedi ákim.
Aita keteiik, buǵan deiin Nurlan Noǵaev oblystaǵy 7 aýdan men 52 aýyldyq okrýgtiń bárin aralap shyqqan edi. Sapar barysynda ol aýdandardyń áleýmettik-ekonomikalyq jaǵdaiymen tanysyp, halyqtyń turmysyn óz kózimen kórip shyqty. Sapar qorytyndysy boiynsha kózdelgen 223 is-sharanyń 187-i biyl, al 26-y 2017 jyly júzege asyrylady dep josparlanyp otyr.
"Ult aqparat"
