Nur-Sultan qalasynyń bas memlekettik sanitarlyq dárigeri Sarhat Beisenova elordadaǵy epidemiologiialyq jaǵdaiǵa bailanysty turǵyndarǵa úndeý jasady, dep habarlaidy QazAqparat.
«Qurmetti elorda turǵyndary men qonaqtary! Búkil álemde COVID-19 epidemiologiialyq jaǵdaiyn turaqtandyrý úshin qajetti sharalar qabyldanýda, onyń ishinde halyq arasynda ujymdyq immýnitetti qalyptastyrý bar. Ujymdyq immýnitettiń ońtaily deńgeiine qol jetkizý úshin qala halqynyń keminde 60%-yn COVID-19-ǵa qarsy vaktsinamen qamtý qajet. Búgingi tańda ózin-ózi oqshaýlaý jáne basqa da shekteý sharalarynyń balama sheshimi – vaktsinalaý bolyp otyr», - dedi Sarhat Beisenova elorda ákimdiginiń brifinginde.
Spikerdiń aitýynsha, elorda turǵyndarynyń 14,3%-y COVID-19-ǵa qarsy vaktsinanyń bir dozasyn alǵan.
«Demek, biz jappai immýnitetke qol jetkizýge birtaban jaqyndap, COVID-19-dy jeńýdemiz. Biz vaktsinany qala turǵyndaryna qoljetimdi etý úshin bárin jasap jatyrmyz. Osy oraida, men barshańyzdan búginge deiin qol jetkizgen jetistikterimizdi saqtap, jańa qalypty jaǵdaiǵa oralý úshin vaktsina alýǵa shaqyramyn. Sondai-aq, turǵyndardan buqaralyq is-sharalarǵa, aktsiialarǵa jáne utys oiyndaryna qatyspaýlaryńyzdy ótinemin. Mundai sharalardy tek onlain rejiminde uiymdastyrýyńyzdy suraimyz, óitkeni qala burynǵysynsha qyzyl aimaqta ornalasqan», - deidi S. Beisenova.
Aita keteiik, mamyr aiynyń basymen salystyrǵanda 100 myń turǵynǵa shaqqandaǵy aptalyq syrqattaný kórsetkishi 210-nan 110-ǵa deiin tómendedi. Bir aptada SOVID-19 boiynsha 1315 jaǵdai tirkeldi, syrqattaný kórsetkishi aldyńǵy aptadan 18%-ǵa tómen.
9 maýsymdaǵy jaǵdai boiynsha elorda halqynyń 9,4% nemese 111 683 adam eki komponentti tolyq aldy. Birinshi komponentpen 169 632 adam nemese 14,3% qamtylǵan.
