Elordada turǵyndardy vaktsinalaýǵa yntalandyrý úshin keibir saýda ortalyqtarynda jeńildikter men syilyqtar beriledi. Bul týraly Nur-Sultan qalasy Investitsiialar jáne kásipkerlikti damytý basqarmasynyń basshysy Erlan Bekmurzaev aityp berdi, dep habarlaidy "Ult aqparat".
«Nur-Sultan qalasy sanitarlyq-epidemiologiialyq baqylaý departamentimen birlesip, sanitarlyq talaptardy saqtai otyryp, qalanyń 9 iri saýda-oiyn-saýyq ortalyqtary men saýda úilerinde vaktsina egý pýnktteri ashyldy. Olar: «Mega Silk Way», «Keruen», «Han Shatyr», «Saryarqa», «Ábý-Dabi Plaza», «Aziia Park», «Eýraziia», «Álem» jáne «Mechta». Saýda nysandaryndaǵy vaktsinalaý pýnktteri demalyssyz tańǵy 10:00-den keshki 22:00-ge deiin jumys isteidi», - dedi E. Bekmurzaev elorda ákimdiginde ótken baspasóz máslihatynda.
Onyń aitýynsha, turǵyndardy vaktsinalaýǵa yntalandyrý úshin keibir saýda ortalyqtarynda jeńildik baǵdarlamalary men kásipkerlerden syilyqtar oinatylady.
«Vaktsina alǵan azamattar syilyq ala alady nemese utys oiynyna qatysa alady. Mysaly, ekpeden keiin «Saryarqa» SOO-da Actual Optic-ten 5 myń teńgege jeńildik kýponyn alýǵa bolady. Sondai-aq, blankti toltyryp, Kinoparkten jeńildik alýǵa bolady. «Aziia Park» SOO-da kásipkerlerdiń júldeleri (turmystyq tehnika, elektronika, SOO jalǵa alýshylar atynan syilyqtar) jáne t. b. oinatylady», - dep túsindirdi basqarma ókili.
Aita keteiik, vaktsinalaý pýnktterinde Spýtnik V, QazVac jáne Hayat-Vax («Haiat-Vak») vaktsinalary usynylǵan. Ekpe alý úshin endi emhanaǵa tirkelý, aldyn ala jazylý nemese portalǵa tirkelý qajet emes.
