Elordada qandai meditsinalyq mekemeler koronavirýsqa PTR testileý júrgizetinin jáne bir adamǵa reagent baǵasy qansha turatynyn anyqtaldy, - dep jazady "Ult aqparat".
«Invivo» meditsinalyq zerthanasynda bir reagent qunynyń baǵasy – 18 500 teńge.
«Shilde aiynan bastap, test júrgizemiz be, joq pa, áli belgisiz. Reagent jetkizýshiniń keshigýinen PTR testileýdi 2 shildege qaldyrdyq. Bastasaq ta, qatań túrde aldyn ala jazylý boiynsha qabyldaimyz. Testileý baǵasynyń da ózgerý-ózgermeýi belgisiz», - dep jaýap berdi zerthananyń Call-ortalyǵy.
«Green clinic» kópbeiindi meditsinalyq ortalyǵynda PTR ádisimen testileý quny sál qymbatyraq.
«Bizde reagent taýsylyp qaldy. Shildeniń basynda jetkizilýi tiis. PTR ádisimen testileý quny – 19 300 teńge. Onyń nátijesi 6 nemese 8 kúnde belgili bolady», - dedi meditsinalyq ortalyqtan.
Aita keteiik, búgin Ortalyq kommýnikatsiialar qyzmetinde Densaýlyq saqtaý vitse-ministri Liýdmila Biýrabekova PTR-testileýden ótý quny – testiń óziniń satyp ákelingen baǵasynan nelikten qymbat ekenin túsindirdi.
«Bul jerde tólem PTR-test úshin ǵana jasalmaidy. PTR-testileý qyzmeti úshin de aqy alynady. Ol tólemge testiń ózi ǵana emes, bul qyzmetti júrgizýge qajetti materialdar shyǵyny da kiredi. Iaǵni onda 40-qa tarta zerthanalyq buiym bar: materialdarǵa arnalǵan zonttar, kóliktik orta tútigi jáne taǵy basqalar», - dedi Liýdmila Biýrabekova.
Vitse-ministrdiń aitýynsha, bul qyzmet qunyna meditsinalyq qyzmetkerlerdiń qorǵanys quraldary men ailyǵy da kiredi. Sonymen birge, «Ulttyq saraptama ortalyǵy» AQ koronavirýsqa aqyly túrde PTR-test jasaý qyzmetin toqtatty.
«2020 jyldyń 25 maýsymyndaǵy QR Bas sanitarlyq dárigeriniń №43 qaýlysyna sáikes, COVID-19-ǵa zerthanalyq saraptama júrgizý boiynsha aqyly qyzmet ýaqytsha toqtatyldy. Tegin testileý suraqtary boiynsha emhanalarǵa habarlasýyńyzdy suraimyz», - delingen Ulttyq saraptama ortalyǵynyń habarlamasynda.
Ulttyq ortalyqta koronavirýsqa aqyly PTR testileý júrgizý quny 11 500 teńge bolatyn.
