Elordada koronavirýsqa qarsy vaktsina alǵysy keletinderdiń qatary kún sanap artyp keledi. Bul týraly qalalyq Qoǵamdyq densaýlyq saqtaý basqarmasynan málim etti, dep habarlaidy "Ult aqparat".
Máselen, ótken aptamen salystyrǵanda vaktsina alyp jatqandar kórsetkishi táýligine eki eseden astamǵa artty.
Mamandardyń aitýynsha, «Delta» shtamy paida bolǵannan keiin halyqtyń kópshiligi densaýlyǵyna asqan jaýapkershilikpen qarai bastaǵan.
«Vaktsinanyń alǵashqy dozasyn 24 maýsymdaǵy jaǵdai boiynsha, 190,5 myńnan astam azamat aldy. Turǵyndar óz densaýlyǵyna jáne ózgelerdiń densaýlyǵyna jaýapty ekenin túsinip keledi. Biz muny «Delta» shtamynyń (úndi shtamy degen ataýmen belgili) qaýiptiligin túsine bastaǵandyǵymen bailanystyramyz», — dedi Qoǵamdyq densaýlyq saqtaý basqarmasynan.
Qala turǵyndaryn yntalandyrý úshin saýda, oiyn-saýyq ortalyqtary men saýda úilerinde kompiýterlik jáne turmystyq tehnika, jeńildik kýpondary men sertifikattar túrindegi baǵaly syilyqtar oinatylady. Bul aktsiiaǵa jaqynda «Mechta» elektronika jáne turmystyq tehnika dúkenderiniń saýda jelisi qosylady.
Mysaly, «Mega Silk Way» SOO vaktsinanyń birinshi dozasyn alǵandar arasynda avtomobil oinatýda. Ótken táýliktiń ózinde ǵana munda 450-ge jýyq adam vaktsina alǵan. Osyǵan deiin vaktsinalanǵandardyń sany eki jarym ese az bolatyn.
«Biz vaktsinatsiia pýnkterinde ekpe alǵysy keletinderdiń sany artyp kele jatqanyn kórip otyrmyz. Mysaly, «Eýraziia» saýda úiinde buryn kúnine 50-60 adam egilse, keshe shamamen 100 adam qabyldadyq. Sondai-aq emhanalarymyzda da vaktsinatsiianyń ósýi baiqalady: keshe keshke 50-den astam adam egildi. Al ótken táýlikte vaktsinalanǵandardyń sany 100-ge deiin ósti. Qala turǵyndary jańa shtamdy juqtyrmas úshin qaýiptene bastaǵanyn aitady. Óz densaýlyǵyna jaýapkershilikpen qarai bastaǵany bizdi qatty qýantady», — deidi qalalyq №6 emhananyń direktory Dinara Baiserkina.
Eske sala keteiik, elorda ákimi Altai Kólginov vaktsina alatyndar arasynda (jeke qarajat esebinen) eki bólmeli páterdiń utys oiyny ótkiziletinin jariialaǵan bolatyn. Utys oiynyna osy jyldyń 25 maýsymy men 31 tamyzy aralyǵynda preparattyń birinshi komponentin alatyn 18 jastan asqan azamattar qatysa alady. Bul aktsiiaǵa meditsinalyq mekemeler, sondai-aq SOO/SÚ siiaqty qalanyń vaktsinatsiia pýnkterinde ekpe alǵandar qatysa alady. Konkýrsty ádil ótkizý jáne egilgen azamattardy tolyq qamtý úshin (kórsetilgen kezeńde) qalanyń IT-qoǵamdastyǵy jumyldyrylatyn bolady.
