Epidemiologiialyq jaǵdaidyń nasharlaýyna jáne COVID-19 aýrýynyń ósýine bailanysty Nur-Sultanda taǵy bir qalalyq aýrýhana infektsiialyq statsionarǵa ainaldy, dep habarlaidy "Ult aqparat" qala ákimdiginiń resmi saityna silteme jasap.
Endi №1 Kópbeiindi qalalyq aýrýhana 9 shildeden bastap koronavirýstyq infektsiiasy bar patsientterdi qabyldaidy. Onda 600 tósek-oryn ornalastyrylǵan. Bul shara tósek-oryndarynyń jetkiliksiz bolýy sebepti qabyldandy, dep túsindirdi qalalyq Qoǵamdyq densaýlyq saqtaý basqarmasy.
«Ókinishke orai, biz taǵy bir qalalyq aýrýhanada josparly gospitalizatsiiany toqtatýǵa, ony kovidtik statsionarǵa ainaldyrýǵa májbúr bolyp otyrmyz. Sebebi infektsiia juqtyrǵandar sany azaimai tur. Barlyq patsient aýystyryldy. Aldaǵy ýaqytta olardy qalanyń respýblikalyq jáne vedomstvolyq klinikalaryna jiberemiz», - dep túsindirdi qalalyq Qoǵamdyq densaýlyq saqtaý basqarmasynyń basshysy Timýr Muratov.
Osylaisha qala turǵyndaryn aýrýhanaǵa jatqyzý statsionarlardyń kezekshiligine sáikes júrgiziledi. Sondai-aq, ginekologiiadan bólek, táýlik boiy jáne kúndizgi statsionarǵa josparly jatqyzýdy №2 kópbeiindi qalalyq aýrýhana da ýaqytsha toqtatady.
Ótken jazda №1 kópbeiindi qalalyq aýrýhana KVI naýqastaryn emdeitin statsionarǵa aýystyrylǵan bolatyn. Al tamyz aiynyń sońynda koronavirýs infektsiiasy bar sońǵy naýqas shyǵarylǵan soń burynǵy profildik jumysyna qaita kirisken.
«Epidemiologiialyq jaǵdai nasharlap barady. Sońǵy aptada biz úsh aýrýhanany infektsiialyq statsionarǵa aýystyrdyq. Qaladaǵy epidemiologiialyq jaǵdai týraly turǵyndardyń infektsiia joiyldy, karantindi umytýǵa bolady degen pikiri bizge aýyr tiedi. Elorda naýryz aiynan beri «qyzyl» aimaqtan shyqpaǵanyn taǵy da eske salyp óteiin. Bul kórsetkish turǵyndarymyzdyń sanitarlyq talaptardy saqtaýdaǵy jaýapkershiligine tikelei bailanysty», - dep túiindedi vedomstvo basshysy.
Timýr Muratov táýligine aýrýhanaǵa jatqyzylǵandardyń sany 300 adamǵa jetkenin atap ótti. Aitýynsha patsientter aýyr jáne óte aýyr kúide túsip jatyr.
Esterińizge sala keteiik, ótken demalys kúnderi infektsiiamen aýyrǵandardyń kóbeiýine bailanysty qosymsha eki aýrýhana infektsiialyq statsionarǵa aýystyrylǵan: qalalyq psihikalyq densaýlyq ortalyǵy jáne QR Qorǵanys ministrliginiń Bas áskeri klinikalyq gospitali. Al jalpy tósek-oryn sany -300.
Nur-Sultan qalasy boiynsha 9 shilde kúni infektsiialyq statsionarlarda barlyǵy 2 007 naýqas bar, bul tósek júktemesiniń 81%-yn quraidy. Onyń ishinde 156 adam (139 KVI) reanimatsiia bólimshesinde (júkteme 78%), 28 patsient ókpeni jasandy jeldetý apparatynda jatyr. BMSK uiymdarynda 7 088 naýqas koronavirýstyq infektsiia boiynsha em alýda.
