Memleket basshysy Qasym-Jomart Toqaevtyń tapsyrmasy boiynsha Nur-Sultan qalasynda áigili ǵalym Qanysh Sátbaevqa eskertkish ornatyldy. Eskertkishtiń ashylý rásimine Qazaqstan Respýblikasynyń Memlekettik hatshysy Qyrymbek Kósherbaev qatysty, dep habarlaidy Aqorda.
Memlekettik hatshy óz sózinde Qanysh Sátbaevtyń Alash ardaqtylarymen murattas bolǵanyn aitty. Ultqa qyzmet etýde aǵa býyndy úlgi etkenin, el isinde barlyq salaǵa belsene aralasqanyn, Qazaqstan ǵylymynyń órkendeýine eleýli úles qosqanyn atap ótti.
– «Óz eliniń qara tasyn maqtan ete almaǵan, ózge jerdiń altynyn da maqtap jarytpaq emes» degen eken Qanysh Sátbaev. Osy oiǵa salsaq, halqy Qanyshyn qal-qadirinshe ardaqtap, esimin ulyqtap keledi. Ǵulama ǵalymnyń atyna buǵan deiin qala, kóshe ataýlarynyń berilýi – sonyń aiǵaǵy. Keshegi Qazaq taý-ken-metallýrgiia institýtynyń búginde Q.I.Sátbaev atyndaǵy Qazaq ulttyq tehnikalyq zertteý ýniversiteti atalýy da zor mártebe. Bul – ultynyń uly perzentine kórsetken qurmetiniń bir parasy ǵana, – dedi Qyrymbek Kósherbaev.
Jobany Pavlodar oblysynyń ákimdigi men ǵalymnyń jerlesteri – Baianaýyl jurtshylyǵy jáne músinshi Asqar Nartov júzege asyrdy.
Is-sharaǵa Premer-Ministrdiń orynbasary Eraly Toǵjanov, QR Prezidentiniń Ákimshiligi Basshysynyń birinshi orynbasary Dáýren Abaev, Bilim jáne ǵylym ministri Ashat Aimaǵambetov, Ekologiia, geologiia jáne tabiǵi resýrstar ministri Maǵzum Myrzaǵaliev, Nur-Sultan qalasynyń ákimi Altai Kólginov, Pavlodar oblysynyń ákimi Ábilqaiyr Sqaqov, Qanysh Sátbaev atyndaǵy Qazaq ulttyq tehnikalyq zertteý ýniversitetiniń rektory Meiram Begentaev jáne basqa da qoǵam ókilderi qatysty.
Foto:QazAqparat
