«Nur Otan» partiiasynyń Saiasi keńesi bekitken, partiiaishilik irikteýdi ótkizý erejesi jariialandy. Buǵan deiin «Nur Otan» partiiasynyń Lideri Nursultan Nazarbaev 2020 jyldyń 17 tamyzy men 3 qazany aralyǵynda praimeriz ótkizý týraly qaýlyǵa qol qoiǵan bolatyn, dep habarlaidy "Ult aqparat".
Erejege sáikes, praimerizdiń mindeti – «Myqty liderler - Myqty partiia» qaǵidaty boiynsha shynaiy jáne myqty kóshbasshylardy partiia qataryna tartý, belsendi jáne bastamashyl azamattar úshin «áleýmettik lift» qurý, eldi damytý máselelerin talqylaýǵa kópshilikti jumyldyrý, aimaqtardaǵy júieli jumys úshin ózekti máselelerdi anyqtaý, sondai-aq, kandidattardyń jeke jaýapkershiligin arttyrý.
Partiianyń qundylyqtaryn ustanatyn jáne sailaý quqyǵy bar kez kelgen qazaqstandyq úmitker bola alady. Eger kandidat partiia múshesi bolmasa, ol praimerizge qatysýshylardy tirkeý merzimi aiaqtalǵanǵa deiin partiia qataryna qosyla alady.
Kandidattar bastaýysh partiia uiymynan jáne bir oblys, qala nemese aýdannan ózin-ózi usyný jolymen de qatysýy múmkin.
Parlament Májilisiniń qazirgi depýtattary da praimerizge kandidat retinde partiialardyń oblystyq filialdarynyń, sondai-aq Nur-Sultan, Almaty jáne Shymkent qalalarynyń konferentsiialarynda jaryssózderge qatysady.
Úgit-nasihat jumystaryn tikelei kandidattardyń ózderi júzege asyrady jáne ol partiia múshelerimen kezdesýdi, BAQ pen áleýmettik jelide maqala men jazbalar jariialaýdy qamtidy. Jaryssózderge qatysý barlyq kandidattar úshin mindetti. Kandidattar belgili bir eldi mekenderdiń máselelerin kásibi qyzmetke sáikes sheshýge qatysty kózqarastaryn usynady.
Partiiaishilik irikteý erejesinde daýys berý barysynyń ashyqtyǵyn qamtamasyz etý tetikteri qarastyrylǵan. Barlyq kezeńderdi Partiialyq baqylaý komiteti baqylaidy. Al onyń quramyna partiia múshesi bolyp tabylmaityn qoǵam belsendileri de kiredi. Daýystardy sanaýdy ýchaskelik esep komissiialary ár kandidattyń baqylaýshylarynyń qatysýymen júrgizedi.
Zańnamalyq ózgeristerge sáikes, partiialyq tizimderde keminde 30% áielder jáne 20%-y 35 jasqa deiingi jastar usynylýy kerek.
Eske sala keteiik, keshe partiia Tóraǵasynyń birinshi orynbasary Baýyrjan Baibek, aldaǵy praimeriz – bul Elbasy jariialaǵan «Nur Otan» partiiasyn «qaita jandandyrýdyń» mańyzdy bóligi bolyp tabylatyn partiiaishilik demokratiianyń zamanaýi tetikteriniń biri ekenin atap ótken edi.
Praimerizdiń negizgi maqsaty – barlyq deńgeidegi máslihattar men Parlament Májilisindegi tiimdi depýtattyq korpýsty odan ári qalyptastyrý úshin básekelestik negizde jańa kóshbasshylardy aiqyndaý.
Onyń aitýynsha, aldaǵy praimerizde qazirgi trendter eskerilip, dástúrli daýys berýmen qatar onlain-daýys berýdi de ótkizý josparlanyp otyr.
«Partiiamyzdyń Lideri Nursultan Nazarbaev atap kórsetkendei, «partiialyq tizimderge halyqtyń ártúrli bóliginiń ókilderi, bedeldi, azamattardyń senimine ie bolǵan otandastarymyz kirýi tiis». Áleýmettik partiialyq liftti qamtamasyz etý –partiiamyz úshin basty mindetterdiń biri. Sondyqtan partiia múshelerimen qatar qoǵam ómirine bei-jai qaramaityn, daryndy da kreativti barsha qazaqstandyqty aldaǵy praimerizge belsendi qatysýǵa shaqyramyz», - dedi ol.
