Soltústik Qazaqstan oblysynda nemeresin qutqarmaq bolǵan 70 jastaǵy er adam dep sýǵa ketti, dep habarlaidy "Ult aqparat".
SQO tótenshe jaǵdailar departamenti baspasóz qyzmetiniń málimetinshe, oqys oqiǵa 1 shildede saǵat 19.30-da Ǵ.Músirepov atyndaǵy aýdannyń Nejinka eldi mekeninde bolǵan. Esil ózeninde nemeresin qutqarý kezinde 1951 jyly týǵan er adam sýǵa batyp ketken.
Oqiǵa ornyna shuǵyl jetken aýdandyq tótenshe jaǵdailar bóliminiń, jergilikti politsiia qyzmetiniń qyzmetkerleri aýyl turǵyndarymen jáne týystarymen sýǵa batyp ketken er adamdy izdeýge kiristi. Operatsiia qarańǵy túskenge deiin jalǵasty, biraq ol nátije bermedi.
Izdestirý jumystaryna 2 shilde kúni tańerteń SQO TJD jedel-qutqarý jasaǵy tobynyń Petropavldan kelgen 10 súńgýiri qosyldy.
Súńgýirlik jumystar kúrdeli jaǵdaida – úlken tereńdikte, kúshti aǵysta, nashar kóriný jaǵdaiynda júrgizilip jatyr.
Sýǵa ketken er adam Novoishimskoe eldi mekeniniń taksoparkinde taksi júrgizýshisi bolyp jumys istegen eken. Bir kún buryn ol tapsyrys alyp, tapsyrys berýshini 1 shildede Birlik aýylyna aparǵan. Ózimen birge 7
jastaǵy nemeresi bolǵan. Keri qaityp kele jatyp, ol Birlik jáne Nejinka eldi mekenderin jalǵaityn Esil ózenindegi kópirge jaqyn jerde mashinany jýý úshin toqtaǵan. Bir mezet jaǵada júrgen nemeresiniń sýǵa qulaǵanyn, ony qatty aǵyn alyp ketip bara jatqanyn baiqaǵan. Balany qutqarý úshin, er adam sýǵa sekirip, balany jaǵaǵa shyǵarǵan, biraq aǵynǵa tótep bere almai sýǵa batyp ketken.
Mamandardyń aitýynsha, er adam batyp ketken oryn shomylý úshin qaýipti, ol jerde sýǵa túsýge tyiym salynǵan.
Jalpy biyl oblystyń sý aidyndarynda 10 adam qaza tapty, onyń tórteýi shomylý barysynda mert bolǵan. Sýǵa ketkenderdiń úsheýi – bala.
