Elbasy elordanyń "jasyl beldeýin" tikushaqpen aralap, qala ainalasyndaǵy ormandy alqaptyń damý barysymen tanysty, jyldaǵy dástúr boiynsha tabiǵi ortaǵa qyrǵaýyl ushyrý sharasyna qatysty, - dep habarlaidy "Ult aqparat" Elbasy saityna silteme jasap.
Qazaqstannyń Tuńǵysh Prezidenti "jasyl beldeý" osy jyldary jaily klimat qalyptastyrýǵa jáne qala ekologiiasyn jaqsartýǵa aitarlyqtai áser etkenin atap ótti.
"Alǵash egilgen aǵashtar qazir 20 metrge jetip, qalyń ormanǵa ainaldy. Ósimdikter men janýarlar dúniesi baiyp jatyr. Osy ormannyń arqasynda jaily klimat qalyptasyp, ekologiia jaqsaryp keledi. Men "jasyl beldeýdi" damytýǵa atsalysyp júrgen adamdarǵa rizashylyǵymdy bildiremin. Olardyń eńbegi joǵary marapatqa laiyq", - dedi Nursultan Nazarbaev.
Elbasy elordany kógaldandyrý jumysyna Túrkiia, Qytai, Vengriia jáne basqa da elderden ǵalymdar men mamandar shaqyrylǵanyn aitty. Sondai-aq qala ishindegi saiabaq aimaqtaryn damytý jumysyna da toqtaldy.
"Osy jyldary atqarylǵan sharýa jurtshylyq tarapynan keńinen qoldaý tapty. Munda velosiped joldary salyndy, bos ýaqytta demalýǵa qajet dúnieniń bári bar. Turǵyndar jidek pen sańyraýqulaq teredi", - dedi Qazaqstannyń Tuńǵysh Prezidenti.
Elbasy elordanyń "jasyl beldeýine" ulttyq saiabaq mártebesin berýdi, ókiletti organdarǵa qala mańyndaǵy jerlerge tekseris júrgizýdi usyndy. Nursultan Nazarbaev elordany damytý barysyn qaita qarap, shahar aýmaǵyndaǵy bos jatqan jerlerde ishinara qurylys júrgizýge kóshý qajettigin aitty.
Sondai-aq Qazaqstannyń Tuńǵysh Prezidenti qorshaǵan ortany aialaýdyń jáne barshaǵa ortaq bailyqty keleshek urpaq úshin saqtaýdyń mańyzdy ekenin atap ótti.
"Tabiǵatty aialap, tazalyq saqtaý qajet. Aǵashtardy órtten qorǵap, joiylyp ketýine jol bermeý kerek. Munyń bári ózimizdiń balalarymyz úshin, keler urpaqtyń igiligi úshin jasalyp jatyr. Olar osyndai keremet syi qaldyrǵanymyz úshin bizdi maqtan tutatyn bolady. Týǵan jerge degen mahabbat - qazaqstandyq patriotizmniń mańyzdy bóligi. Osy oraida Prezident Qasym-Jomart Toqaevtyń 2025 jylǵa deiin Qazaqstanda eki milliard aǵash otyrǵyzý týraly bastamasyn qoldaimyn. Bul mańyzdy ári jaýapty is. Sol arqyly biz elimizdi kógaldandyramyz. Jasyl jelek ekologiiany jaqsartady jáne halyqtyń densaýlyǵyn nyǵaitýǵa qolaily jaǵdai týǵyzady", - dedi Elbasy.
