Elbasy belgili memleket jáne qoǵam qairatkeri Dáýlet Sembaevtyń qaitys bolýyna bailanysty onyń otbasy men týǵan-týystaryna kóńil aitý jedelhatyn joldady, - dep habarlaidy "Ult aqparat" Elbasy.kz saityna silteme jasap.
Qazaqstannyń Tuńǵysh Prezidenti kórnekti qarjyger, belgili memleket jáne qoǵam qairatkeri Dáýlet Sembaevtyń ómirden ótýine bailanysty aýyr qaiǵyǵa ortaqtasyp, kóńil aitty.
"Sanaly ǵumyryn otandyq qarjy salasyn damytýǵa arnaǵan Dáýlet Hamituly Táýelsiz Qazaqstannyń zeinetaqy júiesin reformalaýǵa, ulttyq valiýtamyz - teńgeniń engizilýine eleýli úles qosqan qairatker tulǵa bolatyn. Ol kóptegen jaýapty qyzmetterdi abyroimen atqardy. Premer-ministrdiń birinshi orynbasary, Ulttyq bank tóraǵasy, Parlament Senatynyń depýtaty boldy.
Bilim-biligimen jáne qajyrly eńbegimen elimizdiń ósip-órkendeýine aianbai atsalysyp, kóptiń zor qurmetine bólendi", – delingen jedelhatta.
