Foto: vera.kz
"Otbasy bank" 17 naýryzda "Naýryz jumysker" baǵdarlamasyn iske qosqaly otyr. Jańa joba jumysshy mamandardy turǵyn úimen qamtýǵa baǵyttalady. Ónerkásip, energetika, kólik, aýyl sharýashylyǵy jáne sý resýrstary sekildi salalardaǵy otandastarymyz úshin múmkindik bolmaq, dep habarlaidy Ult.kz 31-arnanyń Informbiýro jańalyqtar baǵdarlamasyna silteme jasap.
"Otbasy bank" ókilderiniń aitýynsha, jańa baǵdarlama aiasynda 72 milliard teńgege eki jarym myńǵa jýyq nesie berý josparlanyp otyr. Bastysy, ótinim shynaiy ýaqyt rejiminde qabyldanady. Filialǵa erte kelgen adam páterdi birinshi bolyp tańdaidy. Biraq ótinish berýshiniń jumys ornynan anyqtamasy bolýy tiis. Bank qyzmetkerleri tutynýshynyń qai salada jumys isteitinin anyqtaidy.
Birinshi kezekte taý-ken, qaita óńdeý, ónerkásip salasynyń qyzmetkelerine kóńil bólinedi eken. Bank tóraiymynyń sózinshe, baǵdarlama qatysýshysy tehnolog, synama alýshy, júrgizýshi sekildi kásip iesi bolýy kerek. Osy salalarda keńse menedjeri, esepshi, PR-menedjer bolyp jumys isteitin mamandar "Naýryz jumysker" jobasyna qatysa almaidy.
"Páterdiń aýmaǵy men baǵasy Baspana Market portalynda jazylyp tur. Bul baspana qunynyń ósip ketpeýi úshin jasalyp otyr. Máselen, úi alýǵa nietti adam temirjolshy delik. Ol úidi Astana mańyndaǵy monoqaladan ne aýdan ortalyǵynan izdeýi múmkin. Sondyqtan olarǵa ekinshi naryqtan baspana alýǵa ruqsat berip otyrmyz. Al páter árlengen bolsa, alǵashqy jarna 10%", – dedi "Otbasy bank" AQ basqarma tóraiymy Lázzat Ibragimova.
