Foto: Aǵabek Qonarbaiulynyń Facebook paraqshasynan
Qazaqstan musylmandary dini basqarmasy Aqparat jáne qoǵammen bailanys bóliminiń meńgerýshisi Aǵabek Qonarbaiuly 6 jeltoqsan kúni Almaty Ortalyq meshitinde bolǵan jaǵdaiǵa qatysty pikir bildirdi. Ol joldy jaýyp, namaz oqýqa bolmaitynyn aitty, dep habarlaidy Ult.kz.
Aǵabek Qonarbaiuly Facebook paraqshasynda sol kúni qala kóshesinde bolǵan kólik keptelisiniń sebebin túsindirdi.
“6 jeltoqsanda Almaty Ortalyq meshitinde alǵash ret juma namazyna kelýshiler meshit aýlasyna syimai qaldy. Paryz namazy bastalǵanǵa deiin meshit qyzmetkerleri jamaǵatty meshit aýlasyna ornalastyrǵan. Alaida paryz namazy bastalǵan soń meshittiń oń jaq bóligi iaǵni, M.Mámetova kóshesiniń bir bóliginde adamdar 5 minýttyq qulshylyq paryzyn ótedi. Saldarynan kóshe keptelisi paida boldy”, – deidi ol.
Basqarmanyń resmi ókili namaz oqýǵa tyiym salynǵan jerlerdi atap, jumaǵa jinalatyn jamaǵatqa úndeý jasady.
“Qurmetti juma namazyna kelýshi jamaǵat! Paiǵambarymyz (oǵan Allanyń salaýaty men sálemi bolsyn) jeti jerde namaz oqýǵa tiym salǵan. Olar: qoqys jinalǵan jerde, mal soiatyn orynda, qabir basynda, joldyń ústinde, monshada, mal sýarylatyn orynda jáne qaǵbanyń ústinde. Jol ústinde namaz oqýǵa tyiym salýynyń basty sebebi – jol qozǵalysyna kedergi keltirmeý. Ol kóshemen jedel járdem kóligi, órt sóndirý kóligi nemese jumysyna asyqqan adam júretini belgili. Sondyqtan 5 minýtqa kósheni jaýyp namaz oqý qanshama uzyn-sonar kóshe kóptelisin týyndatady”, – dep jazdy Aǵabek Qonarbaiuly.
Sondai-aq ol keleńsiz jaǵdaidyń aldyn alyp, adamdarǵa ziian tigizbeýdiń amalyn jasaý keregin aitty.
“Juma namazyn oqý kezinde joldy jaýyp, basqa adamdarǵa ziian tigizýge bolmaidy. Sol sebepti, barshańyzdy namazǵa erterek kelip, tiisti kórsetilgen oryndarǵa jaiǵasýdy, joldardy jappaýdy, kólikterdi de durys orynǵa qoiýdy, talap pen tártipti qatań saqtaýlaryńyzdy suraimyz”, – delingen jazbada.
Buǵan deiin Almatyda bir top er adam namaz oqý úshin joldy jaýap tastaǵan edi.
