Foto: gov.kz
Qazaqstanda mobildi aýdarymdardy tekserý nátijesi boiynsha azamattarǵa salyq organdarynan habarlamalar jiberile bastaidy. Bul týraly qarjy vitse-ministri Erjan Birjanov málimdedi, dep habarlaidy Ult.kz.
Onyń aitýynsha, ekinshi deńgeili bankter qazaqstandyqtardyń qarjylyq operatsiialary týraly málimetterdi Memlekettik kirister organdaryna joldai bastady. Birinshi toqsan boiynsha derekterdi berý 15 sáýirde tolyq aiaqtalady.
Osydan keiin salyq organdary alynǵan málimetterdi taldap, kameraldyq baqylaý aiasynda tekseris júrgizedi. Negizgi maqsat — salyq salýǵa jatatyn mobildi aýdarymdardy anyqtaý.
Tekserý barysynda kelesi úsh negizgi kriterii eskeriledi:
100 jáne odan da kóp ártúrli tulǵadan túsken aýdarymdar;
qatarynan 3 ai boiy turaqty túsýi;
jalpy somasy 1 020 000 teńgeden asýy.
Vitse-ministrdiń aitýynsha, málimetter tolyq jinalǵannan keiin salyq tóleýshilerge habarlamalar jiberiledi, al olardy oryndaý merzimi — 30 jumys kúni.
«15 sáýirge deiin barlyq derekterdi alamyz. Odan keiin kameraldyq baqylaý rásimin iske qosyp, habarlamalar joldaimyz. Qazaqstandyqtar habarlamalardy mamyr aiynda alady», – dedi Erjan Birjanov.
Sheneýnik naqty qansha adam tekseriske ilinetinin aldyn ala aitý erte ekenin de atap ótti.
