Foto: ashyq derekkóz
Áleýmettik jeliler men messendjerlerde bala 1,5 jasqa tolǵannan keiin áielder jumyssyzdyq boiynsha áleýmettik tólem rásimdei alady degen shyndyqqa sáikes kelmeitin aqparat taralyp jatyr, dep habarlaidy Ult.kz.
Qazaqstan Respýblikasynyń Eńbek jáne halyqty áleýmettik qorǵaý ministrligi mundai «shemanyń» zańdy negizi joq ekenin jáne azamattardy jańylystyratynyn málimdedi.
Taraǵan habarlamalarda áielderge alty ai boiy áleýmettik tólem alý úshin mansap ortalyǵynda jumyssyz retinde tirkelý usynylǵan. Alaida qoldanystaǵy zańnamaǵa sáikes, bala kútimi boiynsha demalysta otyrǵan áieldiń jumys orny saqtalady. Sondyqtan ol jumyssyz retinde tirkele almaidy. Jumyssyz mártebesi tek naqty jumys izdep júrgen jáne jumysqa kirisýge daiyn adamdarǵa ǵana beriledi.
Ministrlik sondai-aq jumysynan aiyrylý boiynsha áleýmettik tólem tek mindetti áleýmettik saqtandyrý júiesine qatysýshylarǵa ǵana taǵaiyndalatynyn eske saldy. Ol úshin azamattar jumyssyz retinde tirkelip, belgilengen talaptardy oryndaýy qajet. Eger tólem alýshy jumysqa ornalassa, bul týraly mansap ortalyǵyna ýaqtyly habarlaýy tiis.
Vedomstvo ókilderi jalǵan málimetter usynylǵan jaǵdaida tólengen qarajat zańnamada belgilengen tártippen qaitarylatynyn eskertti. Sonymen qatar áleýmettik tólemderdi alý maqsatynda ádeii jalǵan aqparat berý alaiaqtyq retinde baǵalanýy múmkin.
Ministrlik málimetinshe, 2025 jyly elimizdiń 12 óńirinde alaiaqtyq faktileri boiynsha 30-dan astam qylmystyq is qozǵalǵan. Bes óńirde 7 sot úkimi shyǵarylǵan. Tergeý barysynda azamattardyń áleýmettik jelilerdegi, sonyń ishinde Instagram jelisindegi jarnamalarǵa senip, áleýmettik tólemderdi zańsyz alý shemalaryna tartylǵany anyqtalǵan.
Osyǵan bailanysty ministrlik azamattardy messendjerler men áleýmettik jelilerdegi kúmándi usynystarǵa senbeýge, jeke derekterin bógde adamdarǵa bermeýge jáne aqparatty tek resmi derekkózderden tekserýge shaqyrdy.
Áleýmettik qoldaý sharalary týraly tolyq aqparatty ministrliktiń resmi saitynan jáne 1414 bailanys ortalyǵy arqyly alýǵa bolady.
