Eńbek jáne halyqty áleýmettik qorǵaý ministri Tamara Dúisenova 72 jasqa deiin jumys isteýge nietti. Bul týraly ol Ortalyq kommýnikatsiialar qyzmetinde ótken brifingte aitty, dep habarlaidy Baq.kz portaly.
"Qazir adamdardyń jasy zeinetke shyǵý uzaqtyǵyna bailanysty. Sondyqtan "myna ýaqytta shyǵý kerek" dep meniń aitqanym emes, ár adamnyń densaýlyǵyna, tabiǵatyna bailanysty bolady. Jas jaǵyna keletin bolsaq, biyl áielder 60,5 jasynda, er azamattar 63 jasynda shyǵyp jatyr. Osy máseleni analar da kóterip jatyr. Osyǵan deiin de qoǵam múshelerimen kezdesip, aityp kórsettim. Bizde 50-60 jasqa deiin 967 myń azamat shyǵady. Onyń 50 paiyzdan astamy - jumys isteitin azamattar. Olardyń eńbekaqysy 175 myńnan joǵary. Jumys istemeitin azamattar 35-40 paiyzyn quraidy. Olardyń eńbek ótili joq. Eger olar zeinetke shyqsa, bazalyq zeinetaqy ǵana alady", - dedi Dúisenova.
Ministr osy bazalyq zeinetaqy parametrlerin kóterý boiynsha da usynys jasalǵanyn aitty.
"Biraz azamat osylai dedi. Biz qoǵamnyń barlyq múshesiniń pikirin tyńdaýymyz kerek. Men múmkindigim bolsa, jumys istegim kelse, 72 jas ta jaqsy dep otyrmyn. Jumys istei alsam, nege zeinette otyrýym kerek?! Zeinetke qai ýaqytta shyǵý kerek bolsa, sol ýaqytta shyǵamyn. Odan keiin múmkindigim bolsa, qoǵamdyq jumys bolsa da, óz otbasyma jumys isteýge daiynmyn", - dedi Tamara Dúisenova.
