QR Bilim jáne ǵylym ministri Ashat Aimaǵambetov Úkimet otyrsynda joǵary oqý oryndary oqytýshylarynyń jalaqy stavkalaryn atady, dep habarlaidy QazAqparat.
«Rektorlardy taǵaiyndaýdyń jańa júiesi engizildi. Osy konkýrstyq júie arqyly keiingi eki jylda rektorlar korpýsynyń 50-nan astamy jańartyldy. Konkýrstyq tártiptiń arqasynda ýniversitetter basshylyǵyna halyqaralyq tájiribesi men ǵylymi áleýetteri bar álemdik úzdik joǵary oqý oryndarynyń túlekteri jáne «Bolashaq» baǵdarlamasynyń stipendianttary taǵaiyndaldy», - dedi Ashat Aimaǵambetov.
Onyń aitýynsha, ár ýniversitette Provost institýty qurylyp, oqý oryndarynyń kadr rezervi de jasaqtalyp jatyr. Al basqarý júiesiniń transformatsiiasy ýniversitetterde innovatsiialyq menedjmenttiń damýyna, sapasyn kóterip tiimdiligin arttyrýǵa áser ete bastaǵan.
«Bilim sapasy birinshi kezekte oqýshylardyń kásibi biliktiligine de bailanysty ekeni anyq. Sondyqtan áriptesterimiz úshin qolaily jaǵdai jasaý bizdiń basty nazarymyzda. Memleket basshysynyń tikelei qoldaýynyń arqasynda biyl qyrkúiek aiynan bastap oqytýshylardyń jalaqysy ortasha alǵanda eki esege jýyq kóterildi. Oqytýshylarǵa 1 stavkaǵa minimaldy túrde 200 myń teńge, ǵylym kandidattaryna 260 myń teńge, ǵylym doktorlaryna 350 myń, al ulttyq ýinversitetterde 400 myń teńgege deiin jalaqy tóleý boiynsha sheshim qabyldandy», - dedi ministr.
