Qorǵanys ministri general-leitenant Nurlan Ermekbaev Tarazǵa ushyp kelip, «Ońtústik» óńirlik qolbasshylyǵynyń 28349 áskeri bólimindegi órt saldaryn joiý jóninde júrgizilip jatqan is-sharalarmen tanysty, dep habarlaidy Baq.kz agenttigi.
«Ońtústik» óńirlik qolbasshylyǵy áskerleriniń qolbasshysy general-maior Qaidar Qaraqulov qazirgi ýaqytta jarylys qaýpi bar zattardan tehnikalyq jáne ákimshilik aýmaqty, syrtqy jáne ishki qorshaýlardy tazartý júrgizilip jatqanyn baiandady.
Habar-osharsyz ketken áskeri qyzmetshilerdi kinologtarmen birge izdestirý jumystary jalǵasýda.
Oq-dáriler qaldyqtarynyń ushý radiýsyn anyqtaý maqsatynda ushqyshsyz ushý qurylǵylarynyń eseptoptary jumys júrgizýde. 28349 áskeri bóliminiń infraqurylymyna keltirilgen zalaldy baǵalaý úshin QR QM Áskerlerdi páterlerge ornalastyrý bas basqarmasynyń komissiiasy jumys jasaýda.
Oq-dárilerdiń bólshekteri 300 metrge, iaǵni bazanyń qorshaýynan tek soltústik jáne ońtústik jaqqa qarai ushqany anyqtaldy. Bazada snariadtar saqtalmaǵan.
Budan basqa, Qorǵanys ministri Tótenshe jaǵdailar ministri Iýrii Ilin jáne Jambyl oblysynyń ákimi Berdibek Saparbaevpen ákimshilik ǵimaratynda «Halyq Qaharmany» ataǵy men ordeni berilgen marqum TJD Órt sóndirý jáne avariialyq-qutqarý jumystary qyzmeti bastyǵynyń orynbasary polkovnik Meiirjan Qaqpasynuly Aimanovtyń týystarymen kezdesti.
«Ońtústik» óńirlik qolbasshylyǵynyń shtabynda qorǵanys vedomstvosynyń basshysy TJ ministri jáne Jambyl oblysynyń ákimimen birge QK qyzmetkeri Orazbek Dairauly Dálibaev, efreitor Rýslan Júrsinbaiuly Janbolatov, mehanik-júrgizýshi serjant Marat Sailaýuly Meshinbai jáne starshina Erkin Erikbaiuly Nádirbekov marqumdardyń otbasylaryna III dárejeli «Aibyn» ordenin tapsyrý rásimine qatysty.
Olardyń bári 28349 áskeri bóliminde qyzmet etti.
Osyndai sharalar Jambyl oblysynyń Tótenshe jaǵdailar departamentinde de uiymdastyryldy.
Jambyl oblysy TJD «ÓSjAQJQ» MM bastyǵynyń orynbasary Meiirjan Qappasynuly Aimanov marqumǵa «Halyq qaharmany» ataǵy men ordeni berildi.
Jambyl oblysy TJD «ÓSjAQJQ» MM Órt sóndirý basshysynyń orynbasary – jedel kezekshisi Aleksandr Nikolaevich Mikropýlo (marqum) I dárejeli «Aibyn» ordenimen marapattaldy.
III dárejeli «Aibyn» ordeni Jambyl oblysy TJD «ÓSjAQJQ» MM Taraz qalasy 3-ÓSB órt sóndirýshi-qutqarýshysy Arnur Serikuly Temirbolatovtyń (marqum), 3-ÓSB aǵa órt sóndirýshi-qutqarýshylar – Eldos Qadyrbaiuly Sandybaevtyń (marqum) jáne Táńirbergen Qudaibergenuly Tórebekovtiń (marqum) otbasylaryna berildi.
Qorǵanys vedomstvosynyń basshysy QR Qarýly Kúshteriniń barlyq jeke quramynyń atynan kóńil aitty. Búkil otbasyna jáne olardyń kámeletke tolmaǵan balalaryna qajetti áleýmettik jáne materialdyq kómek kórsetiledi.
