QR Qarjy ministri Erulan Jamaýbaev Respýblikalyq biýdjettiń atqarylýyn baqylaý jónindegi esep komitetiniń eskertpelerin túzetý jumystary qalai júrip jatqanyn aitty, dep habarlaidy QazAqparat.
«Birqatar eskertpe Qytai Halyq Respýblikasynyń kedendik statistikasymen sáikes kelmeýshilikke qatysty boldy. Bul oraida birqatar obektivti sebep te bar. Eń aldymen ol - Qazaqstanǵa qarai qytai eksportynyń barlyq ýaqytta eksport retinde rásimdelinýde. Alaida olardyń basym bóligi Qazaqstan arqyly tranzittik júk retinde ótedi. Iaǵni, biznesmender júkterin tranzit retinde rásimdeidi. Sol sebepten statistikada aitarlyqtai aiyrmashylyq bolyp otyr. Degenmen, sońǵy úsh jylda úlken jumys júrgizdik jáne qazirgi ýaqytta qytai tarapymen aqparat almasý shynaiy ýaqyt rejiminde júrgizilýde», - dedi ministr Ortalyq kommýnikatsiialar qyzmetindegi baspasóz máslihatynda BAQ ókilderiniń saýalyna orai.
Onyń atap ótýinshe, qazirgi ýaqytta Qazaqstan men Qytaidyń kedendik statistika derekterindegi aiyrmashylyq 25 paiyzǵa qysqarǵan.
«Bul jumysty jalǵastyra beremiz. Munan bólek biýdjettik kiris bóliginiń josparyna, biýdjet shyǵystaryn ońtailandyrý turǵysynda eskertýler boldy. Biz bul usynystardyń barlyǵyn eskerdik jáne Úkimettiń munan arǵy jumysynda qoldanamyz», - dedi Erulan Jamaýbaev.
