Eńbek jáne halyqty áleýmettik qorǵaý ministri Tamara Dúisenova zeinet jasyn 58 jasqa deiin tómendetý boiynsha Qazaqstan áielder qozǵalysynyń ókilderimen besinshi kezdesý ótkizdi, dep habarlaidy "Ult aqparat" vedomstvonyń baspasóz qyzmetine silteme jasap.
Ministr arnaiy jumys toby belsendilerdiń usynystaryn jan-jaqty zerttegenin, sondai-aq zeinetaqymen qamsyzdandyrý júiesin jetildirý boiynsha usynylatyn tásilder týraly aitty.
Kezdesýge qoǵamdyq qozǵalys ókilderi Maiken Bigarstanova, Marina Bachaeva, Olga Smirnova, Gúlnár Smaiylhanova, Janar Jibegenova, Láila Ospanova, Qarlyǵa Ahmetbekova jáne Áielder isteri jáne otbasylyq-demografiialyq saiasat jónindegi ulttyq komissiia múshesi Aziza Shýjeeva qatysty.
Kelissóz barysynda Tamara Dúisenova belsendilerdiń usynysyn ministrlik janynan qurylǵan arnaiy jumys toby jan-jaqty zerttegenin habarlady. Bul rette kelesi faktorlar eskerildi:
- 1998 jylǵy 1 qańtarǵa deiin, iaǵni jinaqtaýshy júie engizilgenge deiin jinaqtalǵan eńbek ótili úshin alynatyn yntymaqty zeinetaqy júiesi mólsheriniń kemýi;
- ekonomikanyń túrli sektorlaryndaǵy jasy 50-den asqan áielderdiń tabys deńgeii;
- áielderdiń zeinetkerlik demalysqa erte shyqqan kezdegi zeinetaqylarynyń boljamdy mólsheri, olardyń tabystary jáne jinaqtaýshy zeinetaqy júiesine qatysý ótili.
Ministr eńbek ótili joq jáne búginde jinaqtaýshy zeinetaqy júiesine qatyspaityn qazaqstandyqtar úshin 50+ jasynda zeinetke erte shyǵý laiyqty tólemderdi qamtamasyz etpeitinin atap ótti.
Bul rette qoldanystaǵy zańnamaǵa sáikes azamattarǵa zeinetke erte shyǵý quqyǵy beriledi. Osylaisha zeinetaqy qorynda zeinetaqy jinaqtary 55 jasqa (erler) jáne 52,5 jasqa (áielder) tolǵanda jetkilikti bolǵan kezde qazaqstandyqtar zeinetaqy annýitetin rásimdei alady (zeinet jasyna jetkenge deiin zeinetaqy jinaqtarynan tólem alý quqyǵy). Ziiandy eńbek jaǵdailarynda jumys isteitin azamattar zeinetaqy annýitetin 40 jastan bastap paidalana alady, bul rette osyndai sharttar boiynsha tólemder 50 jastan bastalady.
Tamara Dúisenova qozǵalys belsendilerine azamattardy zeinetaqymen qamtamasyz etýdi jetildirý maqsatynda ministrlik ázirlegen jańa tásilder jóninde de aitty.
«Birinshiden, biz bazalyq jáne yntymaqty zeinetaqy taǵaiyndaý kezinde parametrlerdi ózgertý týraly bastama kóterdik. Qazir bizdiń usynystarymyz basqa da múddeli memlekettik organdarda qaralady, eger olar qoldaý tapsa – bul kelesi jyldan bastap biýdjetten tólenetin zeinetaqy tólemderiniń mólsherin ulǵaitýǵa múmkindik beredi. Jumys istep júrgen jáne bolashaqta qurmetti demalysqa shyǵatyn zeinetkerler de oń áserin tigizedi
Ekinshiden, biz «Kúmis jas» jobasynyń tetikterin zeinet jasyna deiingi áielderdiń jumyspen qamtylýyn qamtamasyz etý úshin qaita qarastyramyz. Atap aitqanda, biz jobaǵa qatysý merzimin 3 jylǵa deiin ulǵaitýdy josparlap otyrmyz jáne áielderdi jumysqa ornalastyrý úshin biýdjet qarajaty esebinen olardyń jalaqysyn ishinara sýbsidiialai otyryp, arnaiy baǵyttardy qarastyramyz. Bul olardyń zeinetke shyqqanǵa deiin jinaqtaýshy zeinetaqy júiesine barynsha belsendi qatysýyna múmkindik beredi. Bul ásirese eńbek ótili az jáne zeinetaqy qorynda jinaǵy az áielder úshin óte mańyzdy», – dedi ministr.
Qozǵalys ókilderi Qazaqstan Respýblikasy Eńbek jáne halyqty áleýmettik qorǵaý ministrligi ázirlegen tásilderdi oń baǵalady.
Kezdesý sońynda Tamara Dúisenova azamattardy zeinetaqymen qamsyzdandyrý júiesin jetildirý boiynsha jumys jalǵasatynyn atap ótti.
