Densaýlyq saqtaý ministri Aleksei Tsoi aýrýhanada videotúsirilim júrgizýge qoiylǵan shekteýge qatysty pikir bildirdi, dep habarlaidy "Ult aqparat".
«Meditsinalyq statsionarǵa uialy telefon alyp kirýge bolatynyn aita keteiin. Bul turǵyda eshqandai tyiym joq. Ekinshi jaǵynan memlekettik bas sanitarlyq dárigerdiń qaýlysyna sáikes onda videotúsirilim júrgizýge ruqsat berilmeidi. Eń birinshi kezekte bul patsienttiń ózin qorǵaýy úshin kerek», - dedi Aleksei Tsoi.
Densaýlyq saqtaý ministri kóp jaǵdaida patsienttiń ruqsatyn suramai, ony sheshingen kúiinde tósekte videoǵa túsiretinin aitady.
«Kóp adam óziniń aýrýyn jariia etkisi kelmeidi. Ártúrli jaǵdai bar. Etikalyq sipattaǵy, azamattyń jeke keńistigin qorǵaý máseleleri umyt qalmaýy tiis. Sol sebepti videotúsirilim júrgizýge ruqsat joq», - dep atap ótti Aleksei Tsoi.
