Foto: gov.kz
Qazaqstan Respýblikasynyń Eńbek jáne halyqty áleýmettik qorǵaý vitse-ministri Viktoriia Shegai jýrnalisterdiń suraǵyna jaýap bere otyryp, minimaldy jalaqyny qaita qaraý máselesi 2027–2028 jyldarǵa arnalǵan jospar aiasynda qarastyrylyp otyrǵanyn málimdedi, dep habarlaidy Ult.kz.Bul shara Úkimet, Ulttyq bank jáne Qarjy naryǵyn retteý jáne damytý agenttigi birigip júzege asyratyn is-sharalar josparynyń quramyna kiredi.
«Minimaldy jalaqyny qaita qaraý máselesi 2027–2028 jyldarǵa arnalǵan Úkimet, Ulttyq bank jáne Qarjy naryǵyn retteý jáne damytý agenttiginiń birlesken is-sharalary aiasynda qarastyrylǵan», – dedi óz sózinde vitse-ministr.
Elimizde «2026-2028 jyldarǵa arnalǵan respýblikalyq biýdjet týraly» zańǵa sáikes 2026 jyldyń 1 qańtarynan bastap eń tómengi jalaqy mólsheri – 85 000 teńge (ózgerissiz); ailyq eseptik kórsetkish (AEK) – 4 325 teńge (2025 jyly – 3 932 teńge); memlekettik bazalyq zeinetaqy tóleminiń eń tómengi mólsheri – 35 596 teńge (2025 jyly – 32 360 teńge); eń tómengi zeinetaqy mólsheri – 69 049 teńge (2025 jyly – 62 771 teńge); kúnkóris minimýmy – 50 851 teńge (2025 jyly – 46 228 teńge) quraidy.
