Nur-Sultan qalasynyń bas sanitar dárigeri Sarhat Beisenova elordadaǵy epidemiologiialyq ahýaldy baiandady, dep habarlaidy QazAqparat.
«Elordada COVID-19 boiynsha qolaisyz epidemiologiialyq jaǵdai byltyrǵydai Qurban ait merekesin tolyq kólemde atap ótýge múmkindik bermei otyr. Qalada sońǵy 3 kúnde táýligine 1000-nan astam koronavirýs infektsiiasy tirkelgen. Ótken táýlikte 1549 jaǵdai tirkelgen, ósim – 1,9%-dy qurady.
Sońǵy aptada 7989 COVID-19 juqtyrý jaǵdaiy tirkeldi, bul aldyńǵy aptadan 44,23%-ǵa joǵary, jaǵdailardyń ortasha táýliktik tirkelýi 950-den 1550-ge deiin ósti. 100 myń turǵynǵa shaqqanda syrqattanýshylyqtyń aptalyq kórsetkishi 540,7-den 672,2-ge deiin ósti, reprodýktivtik sany – 1,3», - dedi spiker Nur-Sultan qalasynyń ákimdigindegi brifingte.
Onyń aitýynsha, kúrt ósýdiń negizgi sebepteri de burynǵydai halyqtyń shekteý talaptaryn saqtamaýy, maska taqpaýy, ótken mereke kúnderi jappai jinalatyn oryndarǵa barýy boldy.
«Buǵan deiin osyndai ósim jańa jyl, 8 naýryz, 22 naýryz merekelerinen keiin baiqalǵan bolatyn. Sondai-aq epidemiologiialyq anamnezdi jinaý kezinde qaladan tys demalys oryndary men aimaqtaryna shyǵý, shomylý kezinde adamdardyń toptalýynan áleýmettik qashyqtyqtyń saqtalmaýy anyqtalyp otyr. Jalpy syrqattanýshylyqtyń 80,4%-yn eresekter, 16,7%-yn balalar jáne 2,9%-yn jasóspirimder quraidy», - deidi Beisenova.
Naýqastardyń 22,7% - 30-39 jasta, 27,6% - 40-59 jasta, 16,3% - 18-29 jasta jáne 13,8%-y 60 jastan asqan egde jastaǵy adamdar.
