Qazpulse.kz internet portalynyń bas redaktory Zarina Qasenova memlekettik organdardyń BAQ-qa ashyqtyǵyna kedergi keltiretin úsh máseleni atady, dep habarlaidy QazAqparat.
«Birinshiden, memlekettik organdardyń BAQ-pen qarym-qatynas ornatýynda birqatar problema bar. Memlekettik organnyń qaisysy bolsa da, qazir qoiǵan suraǵyńa «saýal hat joldańyz» dep jaýap beredi. Iaǵni mundaida arnaiy saýal hat jazyp, mór basyp, qol qoiyp, skanerleýge týra keledi. Biraq osyǵan qaramastan saýal hatyńyzǵa jaýap kelmei qalýy da múmkin. Máselen keshe dál osylai saýal hat ázirlep, joldaiyq desek, Bas prokýratýra óz qolyńyzben kelip, mekemege tapsyrýyńyz kerek deidi. Pandemiia men HHI ǵasyrdaǵy tsifrlandyrý dáýirinde mundai sharttyń ózi túsiniksiz. Árine, istiń mundai reti jumysty edáýir tejep, ashyqtyq pen aqparattyń jyldamdyǵy shetke ysyrylady», - dep oi bólisti Zarina Qasenova Sybailas jemqorlyqqa qarsy is-qimyl agenttiginiń Facebook paraqshasyndaǵy «Memlekettik organdardyń BAQ-qa ashyqtyǵy máseleleri» taqyrybynda ótken onlain kezdesýde.
Onyń aitýynsha, ekinshi másele – bir jerde oqys oqiǵa týyndaǵan kezde memlekettik organdardyń (nemese kompaniialardyń) ol jaǵdaidy birden rastaýǵa nemese joqqa shyǵarýǵa asyqpaityny. Álbette, birden jaýap beretin memorgandar bar. Áitse de, kóp jaǵdaida «keiin habarlasamyz» dep ýaqyt sozsa, keide tipti «saýal hat joldańyz» dep iz-túzsiz ketetinderi de bar.
«Máselen bir jerdi sý basyp, órt sharpyp jatsa, memorgandaǵy qyzmetker maquldaýdy kútip otyrady. Bul máseleni retteý kerek. Sebebi kez kelgen organnyń nemese kompaniianyń abyroiyn kótere alar bir faktor bar desek, ol – belgili bir oqiǵaǵa birden jaýap berý tártibi. Úshinshi másele – qoiylǵan suraqty basqa organǵa nemese kompaniiaǵa ysyrý. «Bizdiń quziretimizde emes» degen jaýappen jii betpe-bet kelemiz. Aqyry qoiylǵan bir saýal birneshe memlekettik organdy ainalyp kelse de, eshkim jaýap bere qoimaidy», - deidi ol.
Zarina Qasenova áitse de ministrler men ákimderdiń keibiri baspasóz hatshylaryn tańdaýǵa muqiiat mán beretinin aitady. Baspasóz hatshylarynyń arasynda týyndaǵan máselege birden jaýap berýge tyrysatyndary da bar.
