Foto: uiymdastyrýshylardan
Memlekettik keńesshi Erlan Qarin «Ádiletti jáne Progressivti Qazaqstannyń Halyqtyq Konstitýtsiiasy úshin!» Jalpyulttyq koalitsiiasynyń múshelerimen birge Abai oblysyna baryp, óńir jurtshylyǵymen birqatar kezdesý ótkizdi.
Memlekettik keńesshimen birge óńirge Jalpyulttyq koalitsiia músheleri – Májilis depýtattary Nurtai Sabilianov, Erlan Sairov, Nartai Sársenǵaliev, Oqý-aǵartý ministri Juldyz Súleimenova, aqyn Muhtar Niiazov, QR Prezidenti janyndaǵy Jastar saiasaty jónindegi keńestiń múshesi Oljas Súleimen jáne ózge de azamattar bardy.
Sapar aiasyndaǵy negizgi is-shara – Abai atyndaǵy oblystyq kitaphanada ótken óńir aktivimen kezdesý. Talqylaý jumysyna 500-ge jýyq adam – máslihat depýtattary, qoǵamdyq keńes músheleri, saiasi partiialardyń, Qazaqstan halqy Assambleiasynyń, ardagerler uiymdarynyń, biznes, bilim berý, densaýlyq saqtaý, sport salalarynyń, ǵylymi jáne jastar qaýymynyń ókilderi qatysty.
Dialogtyń ózegi – Jańa Konstitýtsiia jobasynyń erejeleri men aldaǵy 15 naýryzda ótetin respýblikalyq referendýmnyń mańyzy.
Memlekettik keńesshi Erlan Qarin jobany ázirleý jumysy ashyqtyq jáne keń qoǵamdyq qatysý qaǵidatyna negizdelgenin, e-Otinish jáne eGov tsifrlyq platformalary arqyly azamattardan kelip túsken usynystar eskerilgenin atap ótti. Onyń aitýynsha, usynylyp otyrǵan ózgerister memlekettik basqarý júiesiniń turaqtylyǵyn nyǵaitýǵa, bilik institýttarynyń ókilettigi men jaýapkershiligi arasyndaǵy teńgerimdi kúsheitýge, sondai-aq adam kapitalyn, bilim men ǵylymdy jáne innovatsiiany memlekettiń strategiialyq basymdyqtary retinde damytýǵa baǵyttaldy.
«Jańa Konstitýtsiiadaǵy negizgi tujyrymdamalyq erejelerdiń basym bóligi tikelei Qasym-Jomart Kemelulynyń bastamasymen usynyldy. Máselen, jańa preambýla Prezidenttiń tujyrymdamalyq tezisteri negizinde ázirlendi. Memleket basshysy – azamattarymyzdyń múddesin qorǵaýǵa baǵyttalǵan birqatar norma men jańashyl bastamanyń avtory», – dedi Erlan Qarin.
Májilis depýtaty Nurtai Sabilianov menshik nysandarynyń barlyq túrin qorǵaý, ulttyq zańnamanyń basymdyǵy men ulttyq valiýtanyń rólin bekitý syndy ekonomikalyq kepildikter kúsheitilgenin atap ótti. Bul biznes pen investitsiialar úshin turaqty jaǵdai qalyptastyrady.
Oqý-aǵartý ministri Juldyz Súleimenova bilim, ǵylym jáne innovatsiiany damytý máselesi strategiialyq basymdyq deńgeiinde bekitilgenin, bul adam kapitalyn qalyptastyrýǵa baǵyttalǵan memlekettik qoldaýdy kúsheitetinin málimdedi.
Májilis depýtaty Erlan Sairov zań shyǵarý bilik tarmaǵy jańarǵanyna jáne Quryltaidyń baqylaý fýnktsiialary kúsheigenine azar aýdarsa, oblystyq ardagerler keńesiniń tóraǵasy Muratqazy Alin Jańa Konstitýtsiianyń ulttyq mádeniet pen dástúrli otbasylyq qundylyqtardy nyǵaitýdaǵy mańyzyn atap ótti.
Sonymen qatar sapar aiasynda óńirdegi shyǵarmashylyq ziialy qaýym ókilderimen kezdesý ótti.
Talqylaý taqyryptary – mádeniettiń, tarihi jadynyń jáne ulttyq biregeiliktiń róli. Erlan Qarin Jańa Konstitýtsiia tek quqyqtyq qujat qana emes, qoǵamnyń qundylyq baǵdaryn aiqyndaityn zamanaýi qoǵamdyq kelisim retinde qarastyrylatynyn atap ótti. Onyń aitýynsha, joba negizinde adamǵa baǵdarlanǵan tásil jatyr. Onda memlekettik saiasattyń basty baǵdary – azamattardyń quqyǵy, bostandyǵy men múmkindikteri.
Qatysýshylar memlekettik qyzmet qaǵidattarynyń tizbesinde tarihi-mádeni murany saqtaý men ulttyq mádenietke qoldaý kórsetý normalaryn bekitýge qoldaý bildirdi.
Sapar barysynda Jalpyulttyq koalitsiia músheleri kásipodaq uiymdarymen, pedagogtar qaýymymen, mádeniet salasynyń ókilderimen, «SemAZ» JShS eńbek ujymymen jáne óńir jastarymen de kezdesti. Dialog aiasynda eńbek adamynyń quqyǵyn qorǵaý, áleýmettik kepildikti qamtamasyz etý, bilim men ǵylymdy damytý, óńirlerdiń ekonomikalyq turǵyda damýyna turaqty jaǵdai jasaý jáne jastardyń ózin tanytý múmkindikterin keńeitý máseleleri talqylandy.
Jalpy, Abai oblysyndaǵy kezdesýler jergilikti jurtshylyqtyń aldaǵy referendýmǵa erekshe nazar aýdaryp otyrǵanyn kórsetti.
