Foto: Oqý-aǵartý ministrligi
Qazaqstan Respýblikasynyń oqý-aǵartý ministrligimen 2023 jyly «Birtutas tárbie» baǵdarlamasy ázirlendi. Ortalyq kommýnikatsiialar qyzmetinde ótken dóńgelek ústel barysynda oqý-aǵartý vitse-ministri Edil Ospan baǵdarlamany júzege asyrý barysy týraly aitty, dep habarlaidy Ult.kz.
Memleket basshysynyń tapsyrmasyna sáikes 2024 jyly baǵdarlama «Ádiletti Qazaqstan – Adal azamat – Ozyq oily ult» jalpyulttyq qundylyqtarǵa sáikes jańartylyp, barlyq bilim berý uiymdaryna engizildi. Biylǵy jyldyń 14 naýryzynda ótken IV Ulttyq quryltaida Prezident quryltai músheleriniń baǵdarlama ataýyn «Adal azamat» etip ózgertý týraly usynystaryn qoldady. Bul ataý baǵdarlamanyń qoǵamnyń tiregi bolar adal, ádil jáne jaýapkershiligi joǵary azamattardy tárbieleý jónindegi negizgi maqsatyn aiqyndaidy.
Baǵdarlamany iske asyrýdyń eki jyly ishinde bilim berý uiymdarynda alty negizgi baǵyt pen 77 qadamdy qamtityn bilim berýdiń biryńǵai ekojúiesin qurýǵa, sonymen qatar synyp jetekshilerin, ata-analardy, psihologiialyq qyzmetterdi qosa alǵanda, qatysýshylardyń keń aýqymyn tartýǵa qol jetkizildi.
"Qundylyqtardy bala boiyna sińirý olardyń jas erekshelikterine sáikes tanymdyq, praktikalyq jáne emotsionaldy komponentterdi qamtý arqyly júrgiziledi. Tanymdyq komponent árbir qundylyqtyń máni men mazmunyn uǵynýǵa, praktikalyq – olardy is júzinde naqty áreketter arqyly iske asyrýyna kómektesedi, al emotsionaldy – bul qundylyqtardy ómirlik ádetke, kúndelikti daǵdyǵa ainaldyrady", – dep atap ótti oqý-aǵartý vitse-ministri Edil Ospan.
Baǵdarlama aiasynda mektepterde Ata-analardy pedagogikalyq qoldaý ortalyqtary, sondai-aq óńirlerde Psihologiialyq qoldaý ortalyqtary ashylyp, qyzmet kórsetýde. Basym baǵyt retinde – óskeleń urpaqtyń basty tálimgerleri men tárbieshileri bolyp tabylatyn synyp jetekshileriniń róli kúsheitilýde.
Sonymen qatar jalpyulttyq qundylyqtar oqý protsesine integratsiialanǵan. Ol pán mazmunynda, synyp saǵattarynda, synyptan tys is-sharalarda kórinis taýyp, bilim berýdiń barlyq deńgeilerinde jaýapty, eńbekqor jáne adal azamat tárbieleýge múmkindik beredi.
