Foto: Aqorda
Qazaqstan Respýblikasynyń jańa Konstitýtsiiasy jobasy boiynsha referendýmnyń ótýine orai shet memleketterdiń basshylary men halyqaralyq uiymdardyń jetekshileri Prezident Qasym-Jomart Toqaevtyń atyna quttyqtaý jedelhattaryn joldady, dep habarlaidy Ult.kz.
Resei Prezidenti Vladimir Pýtin Qazaqstandaǵy konstitýtsiialyq ózgerister eki el arasyndaǵy odaqtastyq qatynastar men jan-jaqty strategiialyq seriktestikti odan ári arttyrýǵa septigin tigizetinin atap ótti.
– Jalpyhalyqtyq daýys berý nátijesi Sizdiń memlekettik institýttardy nyǵaitý jáne eldiń ornyqty áleýmettik-ekonomikalyq ilgerileýin qamtamasyz etý baǵytyndaǵy bastamalaryńyz keńinen qoldaý tapqanyn tolyq rastady,– dep jazylǵan jedelhatta.
Ózbekstan Prezidenti Shavkat Mirziioev aýqymdy saiasi, áleýmettik-ekonomikalyq jańǵyrý Jańa Qazaqstannyń turaqty damýyna yqpal etip, halyqaralyq arenadaǵy abyroi-bedelin nyǵaitatynyna senim bildirdi.
– Osy mańyzdy saiasi naýqanǵa azamattardyń belsendi qatysýynan, sondai-aq referendým nátijesinen Siz júrgizip jatqan reformalardy baýyrlas eldiń halqy jan-jaqty qoldaitynyn anyq kóremiz, – dep jazylǵan Ózbekstan basshysynyń jedelhatynda.
Qyrǵyzstan Prezidenti Sadyr Japarov Memleket basshysyn referendýmnyń tabysty ótýimen quttyqtap, ekijaqty qatynastardyń odan ári qarqyndy dami túsetinine senimdi ekenin jetkizgen.
– Bul tarihi ýaqiǵa elińizdi odan ári órkendetip, halyqtyń ál-aýqatyn arttyrý jolyndaǵy mańyzdy qadam bolatyny sózsiz. Sizdiń jetekshiligińizben yntymaq-birligi jarasqan Qazaqstan keleshekke qol sozyp, halyqaralyq bedelin dáiekti túrde nyǵaityp keledi, – dep jazdy Sadyr Japarov.
Ázerbaijan Prezidenti Ilham Áliev saiasi júieni jańǵyrtýdy jáne basqarý modelin jetildirýdi kózdeitin Konstitýtsiianyń qabyldanýyn Qazaqstan tarihyndaǵy jańa kezeńniń bastaýy retinde sipattaǵan. Onyń pikirinshe, bul elimizdiń serpindi damýyna jáne halyqaralyq arenadaǵy róliniń kúsheiýine oń septigin tigizedi.
