Foto: Aqorda
Aqordada UAE SWAT Challenge-2026 halyqaralyq jarysynan júldeli oralǵan komandalardy saltanatty túrde marapattaý rásimi ótti, dep habarlaidy Ult.kz.
Prezident Qasym-Jomart Toqaev jeńimpazdardy shyn júrekten quttyqtap, olar naǵyz qazaq jaýyngeri rýhynyń qandai bolatynyn álem jurtshylyǵyna pash etkenin, Qazaqstannyń bedelin biikke kótergenin atap ótti.
– Namysty qoldan bermei, bairaqty básekede top jardyńyzdar! Sonyń arqasynda kók Týymyz jelbiredi. Elimizdiń mereii ústem boldy. Halqymyz sizderdi maqtan tutady. Álemniń 48 elinen 100-den astam komanda jinalǵan Dýbaidaǵy dúbirli doda – halyqaralyq mańyzy bar oqiǵa. Bul asa tartysty jarys dep aitsaq, qate bolmaidy. Sebebi barlyq komandalar bes kún boiy óte kúrdeli maqsattarǵa qol jetkizý úshin kóptegen tosqaýyldardy eńserýi qajet boldy. Biraq bizdiń jaýyngerler baryn saldy, áskeri mindetterdi minsiz oryndap, aqyry eń joǵary deńgeidegi sheberlikterin kórsetti. Mundai jarysqa ár memleket óziniń eń myqty sarbazdaryn jiberedi. Soǵan qaramastan el úmitin aqtap, úzdikterdiń úzdigi ataný ońai emes ekeni anyq. Bul kezdeisoq jetistik emes. Ár jetistik – zor erik-jiger men qajyrly eńbektiń jemisi. Ár jeńis – myqty kásibi daiyndyq pen asqan sheberliktiń aiqyn kórinisi. Ózderińiz bilesizder, byltyr osy bedeldi jarysta Qazaqstan quramasy eki kúmis júldeni enshiledi. Biyl da sol jeńis jolyn jalǵastyryp, zor senim artqan ulttyq komandamyz abyroimen oraldy. «Qazaqstan S» komandasy teńdesi joq, iaǵni absoliýtti chempion atandy. Bul – tamasha jetistik, bul jeńis osy týrnirdiń tarihynda qalady. Jyldar zymyrap ótedi, biraq sizderdiń balalaryńyz, osy qýanyshty kúnderdiń kýási bolǵan, sizderdi qoldaǵan, sizderdi maqtan tutqan barlyq adamdar bul jeńisti árdaiym erekshe sezimmen eske alyp, aityp otyrady. Al «Qazaqstan A» komandasy ekinshi orynǵa ie boldy. Bul da óte jaqsy, bárimizdi qýantqan keremet nátije, – dedi Qasym-Jomart Toqaev.
Prezident «Tomiris» qyzdar quramasynyń jetistigine airyqsha toqtaldy.
– Sulý qyzdarymyz óte joǵary deńgeide óner kórsetti, sheberlikpen alǵa shyǵyp, áielder arasynda top jardy. Qazaqstannyń namysyn qorǵaǵan bes quramanyń bári de úzdik 20 komandanyń tizimine kirdi. Bul naǵyz jasampaz otanshyldyq dep kúmánsiz aitýǵa bolady. Tórtkúl dúnie ul-qyzdarymyzdyń myqtylyǵyna kýá boldy. Sondyqtan taǵy da atap ótkim keledi, sizder kórsetken myqty taktikalyq daiyndyq, airyqsha kúsh-jiger men tamasha toptyq jumystyń arqasynda álem jurtshylyǵy qazaqtyń batyl, qaisar jáne ór rýhty ult ekenine kóz jetkizdi. Barshańyzǵa shynaiy rizashylyǵymdy bildiremin. Barlyq bapker men jattyqtyrýshyǵa jáne áskeri basshylarǵa, basqa da mamandarǵa zor alǵys aitamyn, – dedi Prezident.
Memleket basshysy arnaiy jasaq qyzmetkerleri men áskeriler árdaiym tártip pen minsiz kásibiliktiń úlgisin kórsetip, memleket múddesin qorǵaý úshin batyl áreketke daiyn bolýy qajet ekenin aitty.
– Qazirgi kúrdeli ári turaqsyz geosaiasi ahýal el qaýipsizdigin qamtamasyz etýdiń tyń tásilderin ázirleýdi talap etedi. Sondyqtan memleket áskeri-kúshtik qurylymdardy keshendi túrde jańǵyrtýǵa, tehnologiialyq turǵydan jan-jaqty jaraqtandyrýǵa basa mán beredi. Sizderdiń jarystaǵy tabystaryńyz – elimizdiń kúshtik qurylymdaryn júieli damytýdyń, ásker qataryndaǵy joǵary moraldyq rýh pen fizikalyq daiarlyqtyń nátijesi. Sizder Otanǵa qaltqysyz qyzmet etip, antqa adal bolsańyzdar, Qazaqstannyń qorǵanys qabileti nyǵaia túsetinine senimdimin, – dedi Qasym-Jomart Toqaev.
