Foto: Aqorda
Prezident Qasym-Jomart Toqaev Qazaqstannyń Saýd Arabiiasymen yntymaqtastyqty jan-jaqty nyǵaitýǵa airyqsha mán beretinin aitty, dep habarlaidy Ult.kz.
Qasym-Jomart Toqaev Taq murageri, Saýd Arabiiasynyń Premer-ministri Muhammed ben Salman Ál Saýdtyń eki eldiń san qyrly yqpaldastyǵyn ilgeriletýge qosqan eleýli úlesin airyqsha atap ótti.
– Taq murageri Muhammed ben Salman – shyn máninde, jahandyq aýqymdaǵy myqty ári bedeldi kóshbasshy. Onyń óz Otanyn órkendetýdi kózdeitin kóregen ári progressivti strategiiasy, sondai-aq halyqaralyq turaqtylyq pen qaýipsizdikti nyǵaitý isinde atqarǵan róli eń joǵary baǵa men qurmetke laiyq, – dedi Qazaqstan Prezidenti.
Qasym-Jomart Toqaev Muhammed ben Salmandy Qazaqstanǵa memlekettik saparmen kelýge shaqyratynyn rastady.
Faisal Ál-Kahtani óz eliniń Qazaqstan Respýblikasymen strategiialyq seriktestikti odan ári tereńdetýge beiil ekenin aitty.
Ol jaqynda qol qoiylǵan Investitsiialardy kótermeleý jáne ózara qorǵaý týraly kelisim, sondai-aq eki el arasynda Koordinatsiialyq keńes qurý tiimdi bailanystardy jandandyrýǵa jol ashatynyna nazar aýdardy.
Budan bólek, diplomat Taiaý Shyǵystaǵy kúrdeli ahýalǵa bailanysty Qazaqstan Prezidentiniń kórsetken jan-jaqty qoldaýyna Saýd Arabiiasy basshylyǵynyń shynaiy rizashylyǵyn jetkizdi. Sonymen qatar Qazaqstannyń bitimgerlik kelissózderdi kieli Túrkistan shaharynda ótkizý týraly bastamasynyń ózekti ekenine toqtaldy.
Qasym-Jomart Toqaev aimaqtyń turaqtylyǵyn, qaýipsizdigi men ornyqty damýyn qamtamasyz etý áreketterine aldaǵy ýaqytta da járdemdesýge ázirligin, sondai-aq Saýd Arabiiasyna jáne Shyǵanaqtaǵy barlyq elderge tilektestigin bildirdi.
Kezdesý sońynda Prezident Qos Kieniń saqshysy, Saýd Arabiiasynyń Koroli Salman ben Ábdelaziz Ál Saýdqa jáne Taq murageri, Premer-ministr Muhammed ben Salman Ál Saýdqa ystyq yqylasy men sálemin joldap, baýyrlas Saýd Arabiiasy halqyna baq-bereke tiledi.
