Foto: Aqorda
Prezident Qasym-Jomart Toqaev elimizge jumys saparymen kelgen Resei Federatsiiasy Úkimetiniń Tóraǵasy Mihail Mishýstinmen kezdesti, dep habarlaidy Ult.kz.
Kezdesýde Qazaqstan men Resei arasyndaǵy strategiialyq seriktestiktiń jáne odaqtastyq qarym-qatynastyń nyǵaiyp kele jatqany atap ótildi. Sondai-aq ózara tiimdi dialog pen joǵary deńgeide qol jetkizilgen ýaǵdalastyqtardy iske asyrý qarqyn alǵanyna nazar aýdaryldy.
Memleket basshysynyń aitýynsha, Mihail Mishýstinniń Shymkent qalasynda ótetin Eýraziialyq úkimetaralyq keńes otyrysyna jáne Tsifrlyq forýmǵa qatysýy Qazaqstan-Resei bailanystarynyń airyqsha sipatyn jáne ony odan ári óristetýge qos taraptyń umtylysyn taǵy da rastaidy.
– Ekijaqty ekonomikalyq yntymaqtastyqtyń qalai damyp kele jatqany ózińizge málim. Qazirdiń ózinde quny 25 milliard dollarǵa jýyq 122 iri joba iske asyryldy. Saýda kólemi 30 milliard dollarǵa jaqyndady. Bul jaqsy nátije deýge bolady. Resei bizdiń negizgi saýda-ekonomikalyq, investitsiialyq seriktesimiz sanalady. Buǵan árine, qýanyshtymyz, – dedi Qasym-Jomart Toqaev.
Áńgimelesý barysynda Resei Federatsiiasynyń Prezidenti Vladimir Vladimirovich Pýtinniń Qazaqstanǵa jasaityn memlekettik saparyna daiyndyq máselelerine basa mán berildi.
Memleket basshysy Astana aldaǵy sapardy eki el arasyndaǵy strategiialyq seriktestik pen odaqtastyq qatynastardy odan ári damytýǵa tyń serpin beretin óte mańyzdy shara retinde qarastyratynyn jetkizdi.
Prezidenttiń aitýynsha, ázirlik jumystary aiasynda san qyrly yntymaqtastyq taǵy da pysyqtaldy.
Óz kezeginde Resei Úkimetiniń Tóraǵasy qazaq jerinde kórsetilgen syi-qurmet úshin Memleket basshysyna rizashylyǵyn bildirdi. Sondai-aq Qasym-Jomart Toqaevty jalpyulttyq referendýmnyń tabysty ótýimen jáne Qazaqstan Respýblikasynyń jańa Konstitýtsiiasy qabyldanýymen quttyqtady.
Mihail Mishýstinniń aitýynsha, referendým Qazaqstan Prezidentiniń memleket irgesin nyǵaitýdy, ekonomikany damytyp, azamattardyń ál-aýqatyn arttyrýdy kózdeitin saiasatyn barsha halyq qoldaitynyn kórsetti.
– Oraily sátti paidalanyp, Sizge Vladimir Vladimirovich Pýtinniń ystyq yqylasyn jetkizgim keledi. Birer kún buryn Prezidentpen ekijaqty qarym-qatynastyń kún tártibin, sondai-aq biyl mamyr aiyna josparlanǵan saparyna ázirlik jumystaryn egjei-tegjeili talqyladyq. Úkimet bul sapardyń da tabysty ótýine barynsha kúsh salady. Sizdiń byltyr qarasha aiynda Resei Federatsiiasyna jasaǵan saparyńyz barysynda memleketter basshylary qoiǵan barlyq mindetti eki el úkimetteri iske asyryp jatyr, – dedi Mihail Mishýstin.
Sondai-aq taraptar ekijaqty kún tártibindegi ózekti máseleler jóninde pikir almasty.
