Foto: Aqorda
Prezident Qasym-Jomart Toqaevtyń tóraǵalyǵymen Qazaqstan Respýblikasynyń 2021-2025 jyldarǵa arnalǵan ulttyq qaýipsizdik strategiiasyn júzege asyrý qorytyndysy shyǵaryldy, dep habarlaidy Ult.kz.
Úkimet negizgi kórsetkishterge qol jetkizý týraly esep berdi. Sondai-aq birqatar salalyq memlekettik organ jetekshileri basty baǵyttar boiynsha baiandama jasady.
Memleket basshysy geosaiasi ahýaldy eskere otyryp, qoǵamdyq, ekonomikalyq, ekologiialyq, sý jáne azyq-túlik qaýipsizdigi máselelerin pysyqtaý qajettigine nazar aýdardy.
Budan bólek, otyrysta Qazaqstan Respýblikasynyń 2026-2030 jyldarǵa arnalǵan ulttyq qaýipsizdik strategiiasynyń jobasy qaraldy. Memlekettik josparlaý júiesiniń mańyzdy quramdas bóligi sanalatyn bul Strategiia aldaǵy bes jylda bolýy yqtimal syn-qaterlerge tótep berýdiń negizgi tásilderin anyqtaidy.
Jiynda Premer-ministrdiń orynbasary – Ulttyq ekonomika ministri Serik Jumanǵarin orta merzimge arnalǵan basymdyqtar, maqsatty indikatorlar men strategiialyq táýekelderdi basqarý mehanizmderi jóninde baiandady.
Qasym-Jomart Toqaevtyń aitýynsha, jańa Konstitýtsiiany qabyldaý arqyly memleket damýyndaǵy jańa kezeńge qadam basyp, Qazaqstannyń Táýelsizdigin, egemendigi men aýmaqtyq tutastyǵyn senimdi túrde qorǵaýǵa múmkindik týdy. Al atalǵan Strategiia konstitýtsiialyq qaǵidattardyń múltiksiz saqtalýyn qamtamasyz etip, elimizdiń turaqty ári qarqyndy damýyna jaǵdai jasaidy.
Memleket basshysy ulttyq múddeni qorǵaý mindetterin sapaly oryndaýdyń mańyzyna basa mán berdi. Onyń qataryna, atap aitqanda, qorǵanys qabiletin qamtamasyz etý; azamattardy, qorshaǵan ortany jáne aqparattyq keńistikti qorǵaý deńgeiin arttyrý; kiberqaýipsizdik sharalaryn kúsheitý jáne áleýmettik-ekonomikalyq saladaǵy táýekelderdi azaitý máseleleri kiredi.
Sonymen qatar Qasym-Jomart Toqaev ekonomika, bilim men tehnologiia salalarynda suranysqa ie bilikti sheteldik mamandardy tartýǵa qolaily jaǵdai jasaityn baǵdarlamany jedeldetip ázirleýdi tapsyrdy.
