Foto: Aqorda
Memleket basshysy Qasym-Jomart Toqaev Halyqaralyq áielder kúnine arnalǵan saltanatty is-sharada sóz sóiledi. Bul týraly Aqordanyń baspasóz qyzmeti habarlady.
– Eń aldymen, kóktemniń shyraily merekesi – Halyqaralyq áielder kúnimen barshańyzdy shyn júrekten quttyqtaimyn! Bul meiram – meiirim men jylýlyqtyń, danalyq pen sulýlyqtyń nyshany. Áiel – tirshiliktiń tiregi, berekeniń bastaýy. Bul – aqiqat. «Besikti de, álemdi de terbetken» áieldiń júregi – izgiliktiń mekeni. Sondyqtan áieldiń qadiri – eldiń qadiri dep aitsaq artyq bolmaidy.
Búgin men Aqorda tórinde Sizderge jáne barsha Qazaqstan áielderine zor rizashylyǵymdy jáne alǵysymdy aitamyn. Halqymyz qai zamanda da anasyn ardaqtaǵan, qaryndasyna qorǵan bolǵan, qyzdaryn syilap, tórinen oryn bergen. Jurtymyz eń kieli qundylyqtarǵa «Ana» sózin qosyp, «Otan Ana», «Jer Ana», «Ana tili» dep kóne zamannan beri aityp keledi. Babalarymyz «Atadan – ósiet, anadan – qasiet» degen. Osy maǵynasy tereń dástúr qazirgi qubylmaly, kúrdeli zamanda mindetti túrde óz jalǵasyn tabýy kerek. Bul maqsatty oryndaý – urpaqtar aldyndaǵy paryzymyz. Óitkeni ultymyzdyń bolmysy, tili men dili, salt-dástúri urpaqqa ananyń aialy alaqanymen, taǵylymdy tárbiesimen daridy, - dedi Prezident.
