Foto: Polisia.kz
Búgin Abai oblysynyń politsiia departamenti bilim berý mekemelerinde terakt daiyndalyp jatqany týraly habarlamalarǵa bailanysty túsinikteme berdi.
— Messendjerler men chattarda mektepterde terrorlyq aktiler daiyndalyp jatqany týraly jalǵan aqparat taratylyp jatyr. Atalǵan málimetter shyndyqqa janaspaidy jáne halyq arasynda úrei men alańdaýshylyq týǵyzýǵa baǵyttalǵan. Politsiia departamenti azamattardy sabyr saqtaýǵa, arandatýshylyqqa berilmeýge jáne tek resmi aqparat kózderine senýge shaqyrady, — delingen habarlamada.
Teraktiler týraly kórineý jalǵan aqparat taratý — qylmystyq jaýapkershilikke ákep soǵady.
— Qoldanystaǵy zańnamaǵa sáikes, mundai áreket úshin 18 million teńgege deiin aiyppul salý nemese bes jylǵa deiin bas bostandyǵynan aiyrý jazasy kózdelgen. Qurmetti ata-analar, osy aqparatty balalaryńyzǵa túsindirińizder. Abaisyzda jasalǵan áreketter aýyr quqyqtyq saldarǵa ákelýi múmkin, — delingen politsiia habarlamasynda.
Aita ketelik Abai oblysy ákiminiń orynbasary Dimitrii Garikov qyzmetinen ketken edi.
