Foto: Pixabay.com
Astanada qyzyna mektepte oramal taǵýǵa ruqsat bermegen soń, ákesi sotqa shaǵymdandy. Ol bul talap balasynyń quqyǵyn shekteidi dep eseptegen. Bul týraly Ult.kz habarlaidy.
Dálel retinde ol 2016 jylǵy 14 qańtardaǵy Bilim jáne ǵylym ministriniń buiryǵyna silteme jasaǵan. Onda mindetti mektep formasyna qoiylatyn talaptar kórsetilgenimen, bas kiimge tyiym salý týraly ereje joq.
«Kámeletke tolmaǵan qyzdyń ákesi mektep formasyna qatysty erejeniń 16-tarmaǵynyń 2-tarmaqshasyn zańsyz dep tanýdy talap etip, sotqa júgindi. Onda "mektep formasyn kigen kezde dini sipattaǵy kiim men simvolikalarǵa jol berilmeitini" kórsetilgen. Áke "shash pen moiyndy jaýyp turatyn oramaldy" dini sipattaǵy kiim retinde qarastyrýmen kelispeidi», — delingen sot habarlamasynda.
Sot er adamnyń talabyn qanaǵattandyrýdan bas tartty.
Sotta «Bilim týraly» zań men mektep jarǵysyna sáikes, mektep formasy barlyq oqýshy úshin biryńǵai bolýy tiis jáne dini nemese basqa da erekshelik belgilerine jol berilmeitini aityldy.
Sheshim áli zańdy kúshine engen joq.
Aita keteiik, buǵan deiin BAQ-ta Joǵarǵy sottyń mektepte oramal taǵýdy zańdy dep tanyǵany týraly aqparat taraǵan edi. Alaida vedomstvo bul málimdemeni joqqa shyǵaryp, mektep formasyna qatysty talaptardy bekitý quzyreti salalyq ministrlikte ekenin atap ótti. Jáne qoldanystaǵy buiryqtyń kúshin joimaǵanyn málimdedi.
