Foto: Aqmonshaq Nurtazanyń jelidegi paraqshasynan
Almatyda ótken «Altyn hanym – 2026» baiqaýy biyl da qoǵam nazaryn ózine aýdardy. Aýqymdy jobanyń bas júldesin elordalyq mektep direktory, bloger ári kópbalaly ana Aqmonshaq Nurtaza jeńip aldy, dep habarlaidy Ult.kz.
Astana qalasyndaǵy №58 mektep-gimnaziianyń direktory bul joly qoǵamǵa ózge qyrynan tanyldy. Tórt diplomy bar, PhD doktoranty ári bilim salasynyń ókili Aqmonshaq Nurtaza baiqaýda bas júldeni ielenip, «Altyn hanym – 2026» ataǵyna ie boldy.
Qatysýshynyń aitýynsha, baiqaýǵa daiyndyq onyń ómir saltyna eleýli ózgeris ákelgen. Jeńimpaz óz áserimen áleýmettik jelide bólisip, qoldaý kórsetken jandarǵa alǵys bildirdi:
«Búgingi jeńis meniń ǵana emes, meni shyn júrekten qoldaǵan árqaisyńyzdyń jeńisi. Bul – úlken jaýapkershilik, úlken amanat. Alda áli talai belester bar», – dedi ol.
Aqmonshaq Nurtaza daiyndyq barysynda 10 keli salmaq tastap, ózin fizikalyq jáne psihologiialyq turǵydan jańa deńgeige kótergenin aitady.
Jeńimpazǵa berilgen 3 million teńge de qoǵam nazaryn aýdardy. Ol qarajatty jeke maqsatqa emes, áielderdi qoldaýǵa baǵyttalǵan áleýmettik jobaǵa jumsaitynyn málimdedi. Sonymen qatar oǵan sán úii tarapynan shapan tabystaldy.
Baian Alagózova jetekshilik etetin kompaniia uiymdastyrǵan bul baiqaý sońǵy jyldary qoǵamda jii talqylanatyn jobalardyń birine ainalǵan. Jobaǵa 35 jastan asqan, turmystaǵy jáne ajyrasqan áielder qatysyp, tulǵalyq damý, otbasydaǵy ról, qoǵamdyq belsendilik jáne shyǵarmashylyq qabiletteri boiynsha baǵalanady.
Biyl baiqaýǵa elimizdiń ár óńirinen 22 úmitker qatysyp, birneshe ai boiy túrli kezeńderden ótti. Finalda Aqmonshaq Nurtazanyń belsendiligi men kórermen qoldaýy onyń jeńisine áser etti.
Ótken jylǵy jeńimpaz Samal Asanova estafetany jańa «Altyn hanymǵa» tabystady.
