Jahandyq synaqtarǵa laiyqty jaýap berý úshin mediaǵa degen jaýapkershilik kún sanap artyp keledi. Bul týraly «Astana Media Week – 2021» media aptalyǵyn ashqan QR Aqparat jáne qoǵamdyq damý ministri Aida Balaeva aitty, dep habarlaidy QazAqparat.
«Biyl besinshi ret ótip otyrǵan Astana Media Week aptalyǵyna hosh keldińizder! Jyl saiyn ótetin aqparat aptalyǵy – álemdik media úzdikteriniń pikir almasyp, tájiribe bólisetin dástúrli dialog alańyna ainaldy. Búgingi zaman – damyǵan aqparat dáýiri. Sondyqtan, jahandyq synaqtarǵa laiyqty jaýap berý úshin mediaǵa degen jaýapkershilik kún sanap artyp keledi. Sebebi búgingi qoǵamnyń aqparat alýǵa degen suranysy da, talǵamy da ózgerdi. Bul óz kezeginde, únemi úzdikter qatarynan kórinip, básekege qabiletti bolýdy talap etetini daýsyz. Bul media aptalyqtyń ataýy – «Faktiler men emotsiialar». Sońǵy 1,5 jyldyń ishinde adamzatqa emotsialyq qysym kúsheidi. Aqparatpen birge beriletin qyzbalyq ony qabyldaý áserin birneshe erte kúsheitedi. Sonymen qatar feikter men infodemiianyń qazirgi áleminde myqty, tekserilgen fakti jýrnalistiń kásibiliginiń negizgi belgisi sanalady. Qoǵamymyz betpe-bet kelgen qiyndyqtarǵa qaramastan biz sheksiz múmkindikter dáýirinde ómir súrip jatqanymyzǵa nyq senimdimin», - dedi ministr.
Sonymen qatar ol pandemiia kezindegi jýrnalistikanyń airyqsha missiiasyn, onyń eldegi turaqtylyqty saqtaýdaǵy, senimdi ári túpkilikti aqparatpen qamtamasyz etýdegi rólin erekshe atap ótti.
«Osynaý eki kúnde bizdi onlain jáne oflain alańdardaǵy is-sharalar kútip tur. Biz júzbe-júz jáne qashyqtan áńgimelesý basymdyqtaryn biriktirdik. Niet tanytqan barlyq adam is-sharalardyń onlain-transliatsiiadan kóre alady. Media aptalyqtyń jumysyna álemdik bedeldi BAQ-tyń top-menedjerleri, memlekettik apparat ókilderi, AQSh, Ulybritaniia, Resei, Qazaqstan, Ózbekstan, Qyrǵyzstannan tanymal jýrnalister, dokýmentalister jáne blogerler qatysady», - dedi ol.
Ministr «Astana Media Week» álemdik mediadaǵy maqsaty – ortaq, baǵyty – bir, kásibi mamandardy bir arnaǵa toǵystyratyn biregei joba ekendigin basa aitty.
«Eń bastysy – osyndai ortaq alańdarda ózara jaqyn tanysyp, paidaly keńester tyńdaýǵa múmkindik alý – media salanyń nátijeli damýyna tyń serpin beredi dep senemin! Barshańyzǵa jemisti de nátijeli jumys tileimin!»,- dedi Aida Balaeva.
