Foto: pixabay.com
Qostanai oblysynyń prokýratýrasy apelliatsiialyq tártipte maining jabdyqtaryn zańsyz eksporttaýǵa áreket etý isi boiynsha qatań jaza qoldanýdy talap etti. Kompaniianyń quny 500 million teńgeden asatyn serverlerdi elden alyp shyǵý áreketi olardyń tolyqtai tárkilenýimen aiaqtaldy, dep habarlaidy Qostanai oblysy prokýratýrasynyń baspasóz qyzmeti.
Oqiǵa Beiimbet Mailin aýdanyndaǵy «Aiat» avtokólik ótkizý beketinde bolǵan. Resei Federatsiiasyna shyǵýǵa áreket jasaǵan kezde 8 tonnadan astam maining serverlerin tasymaldap bara jatqan júk kóligi anyqtaldy. Tekserý barysynda bul tehnikanyń mindetti eksporttyq baqylaýǵa jáne litsenziialaýǵa jatatyn arnaiy taýarlar qataryna kiretini belgili boldy. Alaida «B2C mining» JShS-de tiisti ruqsat qujattary bolmaǵan.
Alǵashynda birinshi satydaǵy sot kompaniiany Ákimshilik quqyq buzýshylyq týraly kodekstiń 463-babynyń 1-bóligi boiynsha kináli dep tanyp, nebári 98 300 teńge kóleminde eń tómengi aiyppul salǵan. Bul rette quqyq buzýshylyq zatyna mindetti túrde tárkileý týraly normany eskermegen.
Mundai sheshimmen oblystyq prokýratýra kelispei, apelliatsiialyq ótinishhat engizdi. Qadaǵalaý organy zańǵa jáne Joǵarǵy sottyń túsindirýlerine sáikes mundai jaǵdaida quqyq buzýshylyq nysandary mindetti túrde memleket kirisine ótkiziletinin atap ótti.
Apelliatsiialyq satydaǵy sot prokýrorlardyń ustanymyn qoldady. Nátijesinde qymbat jabdyq tolyqtai tárkilendi. Oblystyq sottyń qaýlysy zańdy kúshine endi, múlik belgilengen tártippen memleket menshigine beriledi.
