Foto: Politico.kz
Pavlodar oblysynyń Maiqaiyń kentinde eki úiden mýmiialanǵan kúide tabylǵan áke men qyz jerlendi. Olardyń naqty qaitys bolǵan kúnderi anyqtaldy. dep habarlaidy Ult.kz.
Bul týraly Tengrinews.kz jazdy. 13 aqpanda politsiia qyzmetkerleri kenttegi kórshiles ornalasqan eki jeke turǵyn úiden er adam men áiel adamnyń mýmiialanǵan máiitterin tapqan bolatyn. Úilerdiń birinde qart áiel, onyń alty jasar nemeresi jáne qyzdyń naǵashy ápkesi turǵan.
Politsiia men ákimdik ókilderi zeinetkerdiń úiine dárigerlerdiń habarynan keiin barǵan. Dárigerler otbasy músheleriniń biri uzaq ýaqyt boiy qabyldaýǵa kelmegenin aitqan. Úige barǵan kezde eshkim esik ashpaǵan.
Tekserý barysynda eki bólek úiden eki adamnyń mýmiialanǵan denesi tabyldy. Atalǵan derek boiynsha sotqa deiingi tergeý bastaldy. Qart áiel men onyń úlken qyzy politsiiaǵa jetkizildi, al kámeletke tolmaǵan qyz meditsinalyq tekserýge aýrýhanaǵa jatqyzyldy, keiin ony balalar úiine ornalastyrý josparlanǵan.
Anyqtalǵandai, tabylǵan máiitterdiń biri – alty jasar qyzdyń anasy, 39 jastaǵy Natalia. Ol 2024 jyldyń 7 aqpanynda qaitys bolǵan. Ekinshi máiit – onyń 57 jastaǵy ákesi, ol 2025 jyldyń 22 qyrkúieginde kóz jumǵan.
18 aqpanda áke men qyz jer qoinyna tapsyryldy. Qulpytastarynda olardyń týǵan jáne qaitys bolǵan kúnderi kórsetilgen. Jerleý rásimin Germaniiadan arnaiy kelgen týystary uiymdastyrǵan.
Marqum Natalianyń synyptastary men tanystary bolǵan jaitqa áli de sene almai otyr. Synyptasy Zarina Jumaevanyń aitýynsha, Natalia sabyrly, aqkóńil ári bilimdi bolǵan. Mektepti úzdik bitirip, keiin býhgalter mamandyǵyn alǵan jáne jergilikti altyn óndirý kásipornynda jumys istegen.
Qyzyn dúniege ákelgennen keiin oǵan onkologiialyq aýrý diagnozy qoiylǵan. Áriptesteriniń aitýynsha, alǵashqy em kýrsyn ótken soń ol terapiiadan bas tartqan. Ákesi ony aýrýhanaǵa aparýǵa tyrysqanymen, anasy ruqsat bermei, er adamdy bólek úige kóshirip jibergen.
Jergilikti turǵyndardyń sózinshe, marqumnyń anasy poshtaǵa zeinetaqy alýǵa jáne dúkenge baryp júrgen, alaida eshkimdi aýlaǵa kirgizbegen.
Qylmystyq is naqty qai bap boiynsha qozǵalǵany ázirge jariialanǵan joq. Marqumnyń anasy men ápkesi qazirgi ýaqytta Pavlodar qalasyndaǵy psihikalyq densaýlyq ortalyǵynda meditsinalyq tekserýden ótýde.
Oblystyq sottyń málimetinshe, áielderge qatysty bultartpaý sharasy ázirge tańdalmaǵan.
Tergeý amaldary jalǵasyp jatyr.
