Elordadaǵy Qazaqstan qarýly kúshteri Ulttyq áskeri-patriottyq ortalyǵynda Ekinshi dúniejúzilik soǵystaǵy urys alańdarynda qaza tapqan qazaqstandyq jaýyngerlerdiń týystarynyń qatysýymen is-shara ótti, dep habarlaidy QR QM baspasóz qyzmeti.
Izdestirý toptarynyń jumysynyń arqasynda habar-osharsyz ketken Qaraǵandy oblysy Qarqaraly aýdanynyń týmasy Rapyq Shámishev jáne 1942 jyly aqpanda Qorǵaljyn aýdandyq áskeri komissariatynan áskerge shaqyrylǵan qyzyl áskerler – Kámen Jumanov, Tolysbai (Tólebai) Jumabekovtyń súiekteri elge jetkizildi. Olardyń súiekteri týǵan jerdiń qoinaýyna tapsyrylatyn bolady.
– Meniń ákem Rapyq Shámishev 1912 jyly dúniege kelgen. 1942 jyly ony Qarqaraly aýdanynyń áskeri komissariaty ásker qataryna shaqyrdy. Men ol kezde tórt jasta, inim ekide edi. Anamnyń aitýynsha, áskeri komissariattan adamdar kelip, sol túni ákem soǵysqa attanǵan. Biz jylap qaldyq. Ony tabylǵanyn aitqan kezde, men senbedim, shatastyrǵan bolar dep oiladym, óitkeni kóp ýaqyt ótken edi, – dedi sarbazdyń qyzy Erkesh Shámisheva.
Sarbazdardyń súiekterin «Rjev. Kalininskii front-2021» atty halyqaralyq ekspeditsiia kezinde reseilik «Pioner» izdestirý jasaǵy tapqan. Qazaqstanǵa Áskeri-áýe kúshteriniń áskeri-transporttyq aviatsiia bortymen jetkizildi.
– Ai saiyn bizge qaza tapqan jáne habarsyz ketken sarbazdardyń týystary men jaqyndarynan on shaqty ótinishter kelip túsedi. Biz Qazaqstan men Reseidiń izdestirý jasaqtarymen tyǵyz bailanysta bolyp, Resei Federatsiiasy aýmaǵynda tabylǵan jaýyngerlerdiń týystaryn izdeýde áskeri komissariattarmen jumys jasaimyz, – dedi Ulttyq áskeri-patriottyq ortalyǵy Áskeri-tarihi murajaiy izdestirý-ekspeditsiialyq jasaǵynyń qyzmetkeri Ásem Qanapina.
Soǵys jyldary Qazaqstannan áskerge shaqyrylyp, iz-túzsiz joǵalǵan jaýyngerlerdi «Atamnyn Amanaty» qoǵamdyq birlestigi izdeý jumystarymen belsendi ainalysady.
– Búgingi is-shara – kóptegen adamnyń, uiymnyń, birinshi kezekte Qazaqstan jáne Resei qorǵanys ministrlikteri men «Pioner» izdestirý jasaǵynyń aýqymdy jumysynyń nátijesi, – dedi qoǵamdyq birlestiktiń tóraǵasy Murat Moldaǵaliev.
