Senat tóraǵasy Máýlen Áshimbaev Túrkiianyń Qazaqstan Respýblikasyndaǵy Tótenshe jáne Ókiletti Elshisi Ýfýk Ekidjidi qabyldady, dep habarlaidy "Ult aqparat" QR Parlamenti Senatynyń baspasóz qyzmetine silteme jasap.
Kezdesý barysynda taraptar saýda, ekonomika, mádeniet jáne bilim berý salalaryna qatysty ekijaqty ózara is-qimyl máselelerin talqylady.
«Túrkiia – elimiz úshin saiasi, mádeni jáne ekonomikalyq-investitsiialyq turǵydan mańyzdy strategiialyq seriktes memleket. Táýelsizdigimizdiń alǵashqy kúnderinen bastap qazaq-túrik bailanystary barlyq salada qarqyndy damyp keledi. Búginde memleketterimizdiń basshylary arasyndaǵy turaqty qarym-qatynastyń arqasynda ózara yntymaqtastyq joǵary deńgeige kóterildi», – dedi Máýlen Áshimbaev.
Sonymen qatar suhbattasýshylar Túrkitildes memleketterdiń yntymaqtastyq keńesi aiasynda túrkitildes halyqtardyń integratsiiasyn dáiekti túrde damytý máselelerine nazar aýdardy.
Odan bólek, Senat Spikeri búginde eki memleket arasynda parlamentaralyq yntymaqtastyq ta belsendi damyp kele jatqanyn atap ótti. Máýlen Áshimbaev bul baǵytta Túrkitildes elderdiń Parlamenttik Assambleiasy mańyzdy jumys atqaryp kele jatqanyn aitty.
