Mańǵystaýda 2 kúnniń ishinde koronavirýstan 6 adam kóz jumdy. Bul týraly Qoǵamdyq kommýnikatsiia ortalyǵynda ótken brifingide Mańǵystaý oblysy sanitariialyq-epidemiologiialyq baqylaý departamentiniń basshysy Ǵaziz Nadýev málim etti, dep habarlaidy "Ult aqparat".
Onyń aitýynsha, Mańǵystaý oblysynda epidemiologiialyq ahýal kúnnen kúnge kúrdelenip barady. Máselen, 7-13 shilde aralyǵynda koronavirýs infektsiiasynyń 965 jaǵdaiy tirkelgen. Al sońǵy eki kúnde qaýipti aýrýdan 6 adam kóz jumdy.
«Ókinishke qarai, turǵyndar áli de bolsa túrli jiyndarǵa, merekelik sharalarǵa qatysady. Sáikesinshe, betperde taǵý, áleýmettik ara qashyqtyqty saqtaý, qol gigienasy siiaqty karantindik talaptar saqtalmaidy. Osynyń barlyǵy indettiń órshýine ákeledi. Sondyqtan azamattardy epidemiologiialyq ahýalǵa salmaqty qarap, vaktsinanyń mańyzdylyǵyn túsinýge shaqyramyn», - dedi Ǵaziz Nadýev.
Baspasóz konferentsiiasyna Mańǵystaý oblysy densaýlyq saqtaý basqarmasy basshysynyń orynbasary Amanbek Jumyrov ta qatysty.
Onyń málimetinshe, 1 apta ishinde óńirdegi 10 infektsiialyq statsionarda 530 tósek oryn 701 tósekke kóbeitildi. Aqtaý qalasynyń infektsiialyq statsionaryndaǵy 230 tósek oryn 330-ǵa kóbeise, Janaózen qalasyndaǵy aýrýhanadaǵy 92 tósek oryn 158-ge kóbeitildi. Tósek oryn tolymdylyǵy 62,7%. Oblys boiynsha koronavirýs indetine qarsy barlyǵy 440 adam em qabyldap jatyr. Onyń 202-i jasandy otteginiń kómegimen demalýda. Jansaqtaý bólimine 44 naýqas ornalastyrylǵan.
«Osy kúnge deiin oblysqa kelgen vaktsinanyń 212 250 dozasy jetkizildi. Onyń 121 767 dozasy egildi. Qazir qoldanysta reseilik «Sputnik V», otandyq «QazVac» jáne «CoronaVac» vaktsinalary bar. I – komponentpen 83654 , II – komponentimen 44480 adam egildi. 1 aqpan men 1 shilde aralyǵynda 1-komponentpen 58 815 adam egilse, 1-14 shilde aralyǵynda 24 839 adam vaktsina alǵan», - dedi Amanbek Jumyrov.
