Foto: Úkimet
Densaýlyq saqtaý ministri Aqmaral Álnazarova Mindetti áleýmettik meditsinalyq saqtandyrý mehanizminiń nátijesin baiandap, Parlament synyna jaýap berdi, dep habarlaidy Ult.kz.
"Mindetti áleýmettik meditsinalyq saqtandyrýdyń engizilýi densaýlyq saqtaý salasyn qarjylandyrý kólemin 3 esege – 1 trln-nan 2,9 trln teńgege deiin ulǵaitýǵa múmkindik berdi. Bul salanyń kóptegen baǵyttaryn qarjylyq resýrstarmen barynsha tolyqtyrdy. Onyń ishinde dárigerler jalaqylarynyń 2,3 ese óskenin aityp ketken jón. Turǵyndardyń meditsinalyq kómekke jumsalatyn qalta shyǵyndary 34%-dan 28%-ǵa deiin azaidy. Alaida áli de joǵary bolyp qalyp otyr", - dedi Aqmaral Álnazarova.
Ministrdiń aitýynsha, densaýlyq saqtaý salasyndaǵy qarjylandyrýdyń barlyq kózinen bólinetin shyǵys kólemi jalpy ishki ónimniń 4%-yna jetti.
"Mindetti áleýmettik meditsinalyq saqtandyrý júiesiniń engizilý merzimi «COVID-19» pandemiiasymen qatar keldi. Oǵan qosa, jarnapuldardyń bastapqy parametrleri 1,4 jáne 3,5 esege qysqartyldy. Bul biýdjettiń kiris bóligine áser etti. Mundai jaǵdaida kiris bólikti kezeń-kezeńimen ulǵaityp, jarnapuldardyń bastapqy parametrlerin qaitarý nemese qabyldaǵan kepildikterdi qaita qaraý kerek. Osy maqsatta ótken jyly birneshe máseleniń sebepterin anyqtap, sheshý úshin zertteýler júrgizdik", - deidi spiker.
Vedomstvo basshysy Prezident tapsyrmasymen halyqtyń osal toptaryna meditsinalyq kómekke qoljetimdiligin jetildirý, meditsinalyq kómektiń biryńǵai paketin qalyptastyrý jumystary júrip jatqanyn aitýda.
Búgingi tańda qazaqstandyqtardyń 83% mindetti áleýmettik meditsinalyq saqtandyrý júiesine qosylǵan. Olardyń ishinde 72% memleket tarapynan qamtamasyz etilip otyrǵan osal toptardaǵy azamattar. Atalǵan turǵyndar meditsinalyq kómektiń tolyq qoljetimdiligine ie. Sondai-aq, MÁMS júiesin engizgeli elimizde meditsinalyq-demografiialyq kórsetkishter jaqsarǵany aityldy.
2019 jyldan búginge deiin aýyldyq densaýlyq saqtaý salasyn qarjylandyrý 3 esege (254 mlrd tengeden 776,6 mlrd teńgege deiin), joǵary tehnologiialyq meditsinalyq kómekti qarjylandyrý 2,7 ese ulǵaiyp, turǵyndarǵa joǵary tehnologiialy (protezdeý, stentteý, aorta koronarlyq shýnttaý, transplantatsiia, EKU) meditsinalyq kómekti qoljetimdi etti.
"Atap aitsaq, jalpy ólimniń 8%-ǵa, onyń ishinde náreste jáne ana ólimi tómendedi, al kútiletin ómir súrý uzaqtyǵynyń kórsetkishi 75 jasqa ulǵaidy", - dedi A. Álnazarova.
Búgin Májilis tóraǵasynyń orynbasary Daniia Espaeva Úkimet saǵatynda adamdardyń meditsinalyq qyzmetterdiń kórsetilýine qanaǵattaný deńgeii tómendegenin, MÁMS-ke qatysty berilgen naqty usynystar oryndalmai otyrǵanyn aitqan edi.
