QR Premer-Ministri Asqar Mamin biyl 1 shilde kúni Almaty qalasyna jumys sapary aiasynda Úlken Almaty ainalma avtomobil jolynyń (ÚAAAJ) qurylys barysyn tekserdi, dep habarlaidy "Ult aqparat" primeminister.kz saityna silteme jasap.
ÚAAAJ – Qazaqstan men Ortalyq Aziiadaǵy memlekettik-jekeshelik áriptestik salasyndaǵy jol qurylysynyń iri infraqurylymdyq jobasy. Qurylys-montaj jumystarynyń quny 150 mlrd teńgeni quraidy. Jobany Eýropa qaita qurý jáne damý banki, Islam damý banki, Eýraziia damý banki qarjylandyrady. Kontsessiia shartyna 2018 jyly 20 jyl merzimge qol qoiyldy. Kontsessioner – «Alsim Alarko», «Makiol Inshaat», «SK Ekoplant», «Koreia Ekspressvei» sekildi Túrkiia jáne Ońtústik Koreia kompaniialary qurǵan «ÚAAAJ Investitsiialar jáne Operatsiialar» JShS.
Almaty qalasynyń tóńiregindegi uzyndyǵy 66 km jáne alty jolaqty qozǵalysty úlken ainalma avtomobil joly I tehnikalyq sanat parametrlerine sáikes keletin bolady. Avtojol qurylysymen qatar jańa kópirler, kólik jol aiyryqtary men estakadalar salý kózdelgen.
«Jobany iske asyrý kólik qyzmetin kórsetý sapasyn arttyrady, jol qozǵalysy qaýipsizdigin qamtamasyz etedi, avtomobil kóliginiń qorshaǵan ortaǵa teris áserin azaitady. ÚAAAJ paidalanýǵa berilgennen keiin barlyq tranzittik aǵyn – táýligine shamamen 38 myń avtomobil Almaty qalasyn ainalyp ótetin bolady. Bul rette Qytai men Eýropa arasyndaǵy júk tasymaldaý kólemi ósedi dep kútilýde. Qurylys alańyna shamamen 1600 adam men 600 birlik tehnika jumyldyrylǵan. Qurylys asa belsendi júrgiziletin kezde 3 myńǵa jýyq adamdy tartý josparlanyp otyr», - delingen saitta.
Úkimet basshysy qurylys-montajdaý jumystarynyń qarqynyn arttyrýdy jáne barlyq sapa standarttaryn qamtamasyz ete otyryp, jumysty kesteden 2 jylǵa erterek, 2022 jyldyń sońyna deiin aiaqtaýdy tapsyrdy.
«ÚAAAJ qurylysy Almaty aglomeratsiiasyn ǵana emes, sondai-aq jalpy eldiń tranzittik-kólik áleýetin damytý úshin de mańyzdy», — dedi A. Mamin.
