QR Premer-Ministri Asqar Mamin Qazaqstandaǵy sanitarlyq-epidemiologiialyq ahýalǵa boljam jasady, dep habarlaidy QazAqparat agenttigi.
«Ahýaldy ózderińiz de jaqsy bilesizder. Biz ony jaqsaryp keledi dep sanaimyz. Búginde «qyzyl» aimaqta eki óńir ǵana qalyp otyr. Olar: Pavlodar men Soltústik Qazaqstan oblystary», - dedi Úkimet basshysy BAQ ókilderimen kezdesý barysynda.
Premer-Ministr dereginshe, búginde elimizde 8 mln 880 myń adam koronavirýsqaqarsy vaktsinanyń birinshi komponentimen, al 7 mln 800 myń adam ekinshi komponentimen egilgen.
«Bul - Táýelsiz Memleketter Dostastyǵyndaǵy eń joǵary kórsetkish. Qazir vaktsina alatyn azamattardyń sanatyn keńeittik. Olar: emizýli balasy bar jáne júkti áielder, sonymen qatar 12 men 18 jastaǵy mektep oqýshylary. Pfizer vaktsinasy jetkizildi. Munyń barlyǵy da bizge qazirgi sanitarlyq-epidemiologiialyq ahýaldy osy deńgeide ustap turýǵa múmkindik beredi», - dedi Asqar Mamin.
Onyń atap ótýinshe, aýrýhanalardaǵy tósek-orynǵa, jalpy densaýlyq saqtaý salasyna júkteme tómendep otyr. Búginde elimizdegi infektsiialyq aýrýhanalar 30, al reanimatsiialyq tósek-oryndar 27 paiyzdyq júktememen jumys istep tur.
«Búginde ahýal turaqtandy dep sanaimyz. Joǵaryda atap ótken eki óńir qazirgi qarqynmen júre berse, onda «qyzyl» aimaqtan shyǵýy tiis dep esepteimiz. Osylaisha, búkil Qazaqstan qolaily sanitarlyq jaǵdaida bolady», - dedi Premer-Ministr.
